Díli - Conselho de Imprensa de Timor-Leste (CI) koopera ho Ajénsia Internasionál Programa Nasoens Unidas ba Dezenvolvimentu (PNUD/UNDP) Timor-Leste liuhusi “Spotlight Initiative Project ba elimina violénsia kontra feto no labarik feto,” konsege Produz ona “Matadalan ba Jornalista: Reportajen Violénsia Bazeia ba Jéneru”.
Matadalan ne’e nu’udar guia ida ba jornalista sira hodi halo kobertura ne’ebé sensivel ba jéneru, hodi hafanu públiku nia konxiénsia kona-ba asuntu sosiál sira hanesan violénsia bazeia ba jéneru.
Nune’e, iha loron segunda-feira, 20 Juñu 2022, iha salaun enkontru CI, Quintal Boot, Díli, Conselho de Imprensa no UNDP realiza atividade, Treinamentu ba Treinadór ka Training of Trainer (ToT) ba pesoál CI no organizasaun mídia no jornalista kona-ba matadalan reportájen bazeia ba jéneru, hala’o.
ToT ne’e nu’udar espasu no oportunidade ida atu prepara treinadór hodi hatutan matéria treinamentu referee ba jornalista sira iha rai-laran.
Partisipa iha treinamentu ne’e maka hanesan reprezentante Asosiasaun Jornalista Timor Lorosa’e (AJTL) na’in 2, Timor Leste Press Union (TLPU) na’in 2, Diresaun Rejistu Apoiu Jurídiku (DRAJ-CI) na’in 2 no Diresaun Análize no Dezenvolvimentu Mídia (DADM-CI) na’in 9.
ToT hala’o durante loron rua, 20-21 Juñu 2022. Iha loron dahuluk, Prezidente CI halo introdusaun kona-ba tanbasá ita presiza matadalan, The Asia Foundation (TAF), aprezenta materia kona-ba Violénsia Bazeia ba Jéneru (VBJ) “Mitu kona-ba VBJ, tanbasá ema la halo keixa, númeru kona-ba VBJ, Timor-Leste kombate VBJ, Tipu husi VBJ, sé maka hetan riku, Saída maka ninia konsekuénsia? No saída mama nia kauza no Lei Kontra Violensia Doméstika”.
Iha loron segundu, prezidente CI ko’alia kona-ba termu importante sira iha reportájen VBJ no Diretór DADM, Alberico da Costa Junior ko’alia kona-ba reportájen VBJ. (CI)