Díli – Conselho de Imprensa de Timor-Leste (CI), atribui karteira profesionál ba jornalista hamutuk na’in 8 ne’ebé kompleta ona prosesu estájiu karteira profesionál.
Haktuir iha lei komunikasaun sosiál artigu 14 ko’alia kona-ba asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.
Iha artigu 13, lei komunikasaun sosiál haktuir kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Konsellu Imprensa mak fó no renova.
“Dala ida tan parabens ba na’in hitu, ida maka la mai. Hein katak na’in hitu nia prezensa bele hametin liutan ita nia papél jornalista sira nian hanesan naroman ba ita nia sosiedade,” esplika Prezidente CI, Virgílio da Silva Guterres, iha nia diskursu enseramentu ba atividade atribuisaun karteira profesionál.
Serimónia atribuisaun karteira profesionál hala’o iha salaun Golden Star, Audian, Díli, Tersa-feira (14/06/2022), hetan partisipasaun husi Prezidente Conselho de Imprensa no membru sira, Xefe Gabinete MAPKOMS, reprezentante husi Departamentu Komunikasaun Sosial UNTL no UNITAL, Diretór Ezekutivu, Kargu Diretores, Reponsável órgaun no meiu komunikasaun sosiál sira nomós jornalista.
Entretantu, reprezentante jornalista Natalino de Jesus hato’o agradese wa’in ba Conselho de Imprensa tanba bele fó ona oportunidade ba jornalista estajiáriu sira hodi bele asesu ba karteira profesionál.
“Mezmu ami na’in hirak ne’e, la’ós backgraund mai husi área komunikasaun sosiál, ami husi área ketak-ketak maibé ami sente Chamada (Bolu) atu bele kontribui sai hanesan tilun no matan ba ben comum sosiedade ida nian iha Timor-Leste no mundu,” dehan Natalino.
Jornalista na’in 8 maka hanesan Venessa Auxiliadora da C. R. Alves (GMN-TV), Blandina Mauno (STL), José Timo Caet (Timor Post), José M. B. Sarmento (Naunil Media), Floriana dos Santos Borges (Naunil Media), Mirandolina D. B. Soares (Tatoli I.P), Crisogono Magalhães (STL), Natalino de Jesus Dias (GMN-TV).
To’o ohin loron, Conselho de Imprensa atribui ona kartaun karteira profesionál ba jornalista hamutuk na’in 341. (CI)