Díli – Conselho de Imprensa de Timor-Leste (CI), Uniaun Europeia (UE) no Progrma Nasoens Unidas ba Dezenvolvimentu (PNUD/UNDP), lansa ona matadalan ba jornalista sira kona-ba reportájen violénsia bazeia ba jéneru.
Atividade ne’e hala’o iha salaun Novo Turismo, Lesidere, Díli, iha loron segunda-feira, 13 Juñu 2022.
Prezidente CI, Virgílio da Silva Guterres hateteH manuál ida ne’e mosu atu fó apoiu ba jornalista sira atu hahú agora ba oin bele hatene termu sira iha reportájen bazeia ba jéneru.
“Manuál ida ne’e mosu ho hanoin atu fó kontribuisaun ba kolega jornalista sira. Hahú agora ba oin, hafoin lee tiha manuál ne’e, bele hatene difini ona saída maka identidade jéneru, saída maka orientasaun seksuál, saída maka LGBI, saída maka trans jéneru,” esplika prezidente CI.
Embaixadór Uniaun Europeia, Andrew Jacobs hatete, mídia iha kna’ar atu informa no eduka ninia públiku kona-ba violénsia seksuál no violénsia bazeia ba jéneru.
“Imprensa nu’udar autór xave ba demokrasia ida ne’ebé forte. Tanba ne’e, Uniaun Europeia iha komprimísiu atu fó apoiu ba imprensa Timor-Leste nian ne’ebé relevante no posível,” dehan Embaixadór EU.
Entretantu Sekretária Estadu Igualdade Jéneru no Inkluzaun, Maria do Rosario Fátima Correia hatete, depois de restaurasaun independénsia Timor-Leste iha tinan 20 nia laran, foin iha matadalan dahuluk kona-ba reportájen violénsia bazeia ba jéneru. “Ita espera katak matadalan ida ne’e sei fó valoriza ba iha violénsia bazeia ba jéneru nomós inkluzaun,” espliak Sekretária Estadu.
Projetu dezenvolve matadalan reportájen violénsia bazeia ba jéneru ne’e realiza tanba serbisu hamutuk entre Conselho de Imprensa, UNDP liuhusi projetu Inisiativa Spotlight no hetan apoiu fundus husi Uniaun Europeia.
Conselho de Imprensa orgullu ho produsaun dahuluk matadalan ida ne’e. Orgullu tanba produsaun matadalan dahuluk ne’e ba asuntu delikadu, sensitivu no sempre hamosu diskusaun naruk bainhira mosu notísia sira iha meiu komunikasaun sosiál ne’ebé hamosu “bias” ka prekonseitu pesoál tama ba narativa produtu jornalístiku nian.
Partisipa mos iha lansamentu matadalan ba jornalista sira ne’e mak Membru CI na’in haat, Reprezentante PNUD/UNDP, reprezentante Sosiedade Sivil, Jestór Rádiu Komunidade balun, jornalista sira, Diretór Ezekutivu, Jestor Radio Komunidade balun hosi Minisípiu ho estrutura CI nian. (CI)