Díli – Conselho de Imprensa de Timor-Leste (CI) realiza ezame karteira profesionál ba jornalista estajiáriu hamutuk na’in 8 hafoin remata tuir prosesu estájiu profesionál.
Atividade ezame karteira profesionál ho tipu ezame escrita no oral, hala’o iha salaun enkontru Conselho de Imprensa, Quintal Boot, Díli, tersa-feira, 31 Maiu 2022.
Konselleiru Francisco Belo Simões da Costa no Diretór DADM, Alberico da Costa Junior maka fó ezame kompeténsia (escrita no oral) ba jornalista hirak ne’e.
Konselleiru Francisco Belo Simões da Costa hatete bainhira jornalista hetan ona karteira profesionál maka sei hetan advokasia husi Conselho de Imprensa kuandu ita nia produtu jornalistika tama iha disputa.
“Previlejiu boot ida bainhira ita hetan karteira profesionál maka bainhira ita tama iha disputa sira, ita tama iha problema. Iha ita nia lei mós hatete jornalista ne’ebé hala’o kna’ar jornalista tenke iha karteira profesionál,” esplika Konselleiru Francisco Belo.
Jornalista na’in 8 maka hanesan Venessa Auxiliadora da C. R. Alves (GMN-TV), Blandina Mauno (STL), José Timo Caet (Timor Post), José M. B. Sarmento (Naunil Media), Floriana dos Santos Borges (Naunil Media), Mirandolina D. B. Soares (Tatoli I.P), Crisogono Magalhães (STL), Natalino de Jesus Dias (GMN-TV).
To’o ohin loron, Conselho de Imprensa atribui ona kartaun karteira profesionál ba jornalista hamutuk na’in 341. (CI)