Díli – Conselho de Imprensa de Timor-Leste (CI) hato’o apresiasaun boot ba Parlamentu Nasionál (PN) tanba aprova ona loron nasionál liberdade imprensa.
Iha loron tersa-feira, 24 Maiu 2022, Parlamentu Nasionál liuhusi plenária aprova ho votus afavor 49, kontra 0 no abstensaun 0 ba projetu rezolusaun Parlamentu Nasionál hodi institui loron 16 Outubru kada tinan hanesan loron nasionál ba liberdade imprensa.
“Lori Conselho de Imprensa nia naran hakarak hato’o apresiasaun maka’as teb-tebes ba parlamentu nasionál, na’i Prezidente Parlamentu nomós na’i no lou deputadu sira ne’ebé horseik (24/05), liuhusi debate ida, aprova rezolusaun parlamentar, loron 16 Outubru nu’udar loron nasionál Liberdade imprensa,” Prezidente Conselho de Imprensa, Virgílio da Silva Guterres hato’o apresiasaun ne’e liuhusi konferénsia imprensa, ne’ebé hala’o iha salaun enkontru CI, Quintal Boot, Dili, kuarta-feira (25/05/2022).
Virgílio Guterres dehan esforsu naruk ne’ebé durante ne’e komunidade mídia sira halo, hahú kedas iha inísiu tinan 2000, asosiasaun sira halo ona inisiativa hodi hato’o proposta ba governu, liu-liu iha era, sr. Nelio Isaac sei okupa kargu nu’udar Sekretáriu Estadu Komunikasaun Sosiál.
Iha mandatu Conselho de Imprensa nian, iha tinan 2019, CI halo ona konsultasaun ho Jornalista senior sira, responsável órgaun no meiu komunikasaun, media na’in no jornalista sira hodi hetan konsensu ida hodi propoin ba governu kona-ba loron 16 outubru nu’udar loron nasionál Liberdade imprensa.
Ho nune’e, iha ámbitu komemorasaun loron Mundia Liberdade Imprensa, 3 Maiu 2022, iha parlamentu nasionál, Conselho de Imprensa aprezenta proposta ba parlamentu nasionál kona-ba loron nasionál Liberdade Imprensa.
Finalmente, iha loron 24 Maiu 2022, Parlamentu Nasionál liuhusi sesaun plenária ordináriu aprova ona projetu rezolusaun nú 49/V (4a) kona-ba loron nasionál liberdade imprensa.
Virgílio Guterres mós klarifika katak iha prosesu konsultasaun, mosu proposta lubuk ida, baluk propoin data publikasaun buletim SEARA, balun tau loron jornalista mate hanesan Agus Muliawan, Sunder Thoenes, Robert Tomm ninia mai. “Depois de konsulta sira ne’e, barak liu konkorda ho 16. Razaun tanba 16 Outubru ne’e ninia nuansa trájiku ne’ebé boot,” esplika Virgílio Guterres.
Ba futuru, Conselho de Imprensa, asosiasaun jornalista sira, jornalista, komuniade mídia, nomós ba hirak ne’ebé kontinua luta ba Liberdade imprensa no Liberdade espresaun sei komemora kada tinan ho atividades oioin ne’ebé sei konsentra iha Balibo.
Selebrasaun dahuluk loron nasional liberdade imprensa sei lansa iha Balibo, loron 16 Outubru 2022. (CI)