Díli – Conselho de Imprensa de Timor-Leste (CI) serbisu hamutuk ho Programa Nasoens Unidas ba Dezenvolvimentu (PNUD/UNDP), fasilita formasaun ba jornalista sira kona-ba dezeñu arte.
Atividade ne’e hala’o iha salaun enkontru Conselho de Imprensa, Quintal Boot, Dili, kuarta-feira, 27 abril 2022, hodi komemora loron mundiál Liberdade imprensa ne’ebé monu iha loron 3 maiu 2022.
Objetivu husi formasaun ne’e maka oinsá bele apoiu kapasita jornalista sira hodi hasa’e kualidade jornalízmu iha Timor-Leste.
Aliende jornalista sira, partisipa mós iha formasaun ne’e ofisiál relasaun públika Conselho de Imprensa na’in tolu (3). No jornalista hamutuk na’in 15 husi mídia nasionál sira maka hola parte iha formasaun ne’e.
Diretór Ezekutivu, Rigoberto Monteiro hatete atividade ne’e realiza hodi fasilita jornalista sira atu utiliza meiu seluk ba komunikasaun. Nia hatutan, atividade formasaun ne’e realiza tanba serbisu hamutuk entre CI ho UNDP iha okaziaun komemorasaun loron mundial Liberdade imprensa, 3 maiu 2022.
“Formasaun loron ohin ba jornalista sira atu uja meiu seluk hanesan poster ba komunikasaun. Meiu ida ne’ebé ita bele utiliza hodi hato’o mensajen ba ema ka públiku liuhusi poster ba asuntu-asuntu sira espesífiku,” esplika Diretór Ezekutivu.
Depois de formasaun loron tomak, rezultadu husi poster sira ne’e, lori ba hala’o esebisaun iha parlamentu nasionál iha komemorasaun loron mundial Liberdade imprensa no tinan ida estabelesimentu uma komunikasaun iha Parlamentu Nasionál.
Conselho de Imprensa hato’o agradese wa’in ba UNDP ne’ebé kontinua apoiu CI no jornalista sira hodi hadi’a kualidade jornalízmu iha Timor-Leste. (CI)