Díli – Conselho de Imprensa de Timor-Leste (CI) komemora aniversáriu ba VI liuhusi atividade diskusaun no avaliasaun serbisu CI nian durante tinan neen hamutuk ho parseiru sira, iha salaun enkontru CI, Quintal Boot, Díli, 10 maiu 2022.
Parseiru sira ne’ebé partisipa iha diskusaun no avaliasaun serbisu CI nian maka hanesan Asosiasaun Jornalista Timor Lorosa’e (AJTL), Timor-Leste Press Union (TLPU), União Professional Jornalista Timor-Leste (UPJTL), Departamentu Komunikasaun Sosiál, UNTL no UNITAL, UNPD, Responsável Órgaun no Meiu Komunikasaun Sosiál sira.
Iha diskursu, prezidente Conselho de Imprensa, Virgílio da Silva Guterres hatete durante tinan neen, Conselho de Imprensa moris ho espéritu tolu importante maka hanesan ejisténsia, esensia no rejisténsia.
“Hanesan Prezidente Conselho de Imprensa hakarak fó apresiasaun ba kolega sira hotu, buat importante ne’ebé maka durante tinan 6 iha maka ne’e, ita maske iha diferensia oponiaun, maibé halo ita metin liutan, sólidu liutan,” dehan prezidente CI virgílio Guterres.
Prezidente CI enkoraja nafatin funsionáriu tomak Conselho de Imprensa marka ita nia esensia no kontinua hametin ita luta ka rezisténsia ba oin.
Prezidente Virgílio Guterres dehan Conselho de Imprensa ne’e diferensa ho instituisaun seluk maka ita ko’alia kona-ba Liberdade, Liberdade ida ne’ebé instituisaun seluk mós presiza iha, ida ne’e maka halo ita orgullu serbisu iha Conselho de Imprensa.
Diretór Ezekutivu, Rigoberto Monteiro hato’o agradese wa’in ba funsionáriu sira nia kontribuisaun, konfiansa no lealidade ba instituisaun Conselho de Imprensa nia ejisténsia durante tinan VI.
“Ita presiza sukat ita nia serbisu, susesu períodu fulan tolu ne’e iha ne’ebé? Frakeza ne’e iha ne’ebé? Para depois ita bele tau fali prioridade fulan-fulan sira tuir mai,” haktuir DE, Rigoberto Monteiro perante funsionáriu sira iha atividade evaluasaun asaun anuál nian iha períodu trimester dahuluk.
Conselho de Imprensa, nu’udar entidade administrativa independente ne’ebé atua ba-iha setór komunikasaun sosiál nian, defini tiha ona iha Lei Komunikasaun Sosial nu. 5/2014, loron 19, fulan novembru, no Dekretu-Lei nu. 25/2015, iha loron 5, fulan agustu, kona-ba kriasaun Conselho de Imprensa no aprovasaun ba nia Estatutu.
Conselho de Imprensa estabele iha loron 10 maiu 2016, iha ne’ebé, membru na’in 5 simu pose husi parlamentu nasionál. Kompozisaun membru sira, na’in 2 nomeia husi parlamentu nasionál, na’in 2 husi jornalista sira no na’in 1 hili husi mídia na’in sira. 10 maiu 2022, Conselho de Imprensa kompleta ona nia ejisténsia ba tinan 6. (CI)