Díli – Conselho de Imprensa de Timor-Leste (CI), komemora loron mundiál liberdade imprensa ne’ebé akontese iha loron 3 maiu 2022 liuhusi semináriu ho tema “Jornalízmu iha Serku Dijitalizasaun”, iha salaun Delta Nova, Comoro, Díli.
Loron mundiál liberdade imprensa nu’udar selebrasaun anuál liberdade imprensa nian ne’ebé akontese iha loron 3 maiu no organiza husi United Nation Educational, Scientific and Cultural Organization (UNESCO).
Prezidente Conselho de Imprensa, Virgílio da Silva Guterres hatete depois de tinan rua, jornalista sira no órgaun komunikasaun sosiál sira nia Liberdade hetan limitasaun husi pandemia Covid 19, iha loron 3 maiu 2022 re-organiza hikas jornada jornalízmu nia luta ba liberdade imprensa.
“Agora ita hahú re-organiza ita nia-án ho espasu ne’ebé iha atu hamutuk prezensialmente komemora loron importante sira ne’ebé marka ita nia jornada hanesan povu ne’ebé luta ba Liberdade”, esplika prezidente CI, Virgílio da Silva Guterres
Iha fatin hanesan, MAPCOMS, Francisco Martins da Costa Pereira Jerónimo hatete dezenvolvimentu mídia hahú mundansa husi dékada id aba dekada seluk, iha tinan 1920 rádiu hahú nia atividade, ema barak asesu, ema barak hanoin katak jornal mate ona, maibé to’o ohin loron jornal sira kontinua eziste.
“Iha tinan 1940, televizaun mosu tan, ema hanoin katak jornal no rádiu mate tan ona, maibé to’o agora jornál, rádiu no televizaun kompleta malu,” esplika MAPCOMS.
Ministru MAPCOMS enkoraja entidade jornalízmu hotu katak iha istória jornalízmu nian, nune’e iha komunikasaun sosiál sira sempre iha adaptasaun ba mudansa teknolojia no ema nia toman.
Komemorasaun tinan ida, 03 maiu 2022, Conselho de Imprensa de Timor-Leste (CI) realiza atividade semináriu ida hodi fahe esperiénsia ba malu kona-ba ameasa sira dijitalizasaun ba mundu jornalízmu.
Oradór ba semináriu ne’e mai husi Diretór CEPAD, João Boavida, Dosente UNTL, Dulce Martins, CEO STL Coorporation, Sr. Salvadór J. X. Soares, Consultant CI Unit-UNESCO Jakarta Office, Hesthi Murthi.
Panelita ba semináriu ne’e, prezidente TLPU, Candido Alves, Prezidente AJTL, Zevonia Vieira, Membru Conselho de Imprensa, Expedito Loro Dias Ximenes, no modera husi Diretór Rekursu Umanu CI, Antonio Dias.
Hare ba importánsia kna’ar mídia nu’udar kontrolu sosiál iha país demokrátiku tanba ne’e CI konvida mós MAPCOMS no MAE sai nu’udar oradór xave hodi ko’alia kona-ba jornalízmu iha ameasa dijitalizasaun nomós serimónia agradesimentu ba jornalista ne’ebé hala’o kobertura durante kampaña no eleisaun prezidensiál.
Partisipa iha programa ne’e, Ministru Asuntu Parlamentares no Komunikasaun Sosiál, reprezentante Ministru Administrasaun Estatal, diretores mídia, xefe redasaun, jornalista, AJTL, TLPU, UPJTL, estudante UNTL, UNITAL, UNPAZ, UNDP, UNESCO, STAE, inklui mós sosiedade sivil balun. (CI)