Díli - Prezidente Conselho de Imprensa de Timor-Leste (CI), Virgílio da Silva Guterres hamutuk ho Membru sira inklui Diretór Ezekutivu, Rigoberto Monteiro, hala’o enkontru Kortejia ho Prezidente Repúblika Eleitu, Dr. Ramos Horta, iha nia servisu fatin Faról, Díli, sesta-feira, 06/05/2022.
Enkontru ne’e hodi Kongratula José Ramos Horta, ne’ebé sei hala’o misaun foun nu’udar Prezidente Repúblika durante tinan lima ba períodu 2022 to’o 2027.
Iha oportunidade ne’e, Prezidente Conselho de Imprensa konvida Laureadu Nobel ba Paz atu partisipa no halo abertura ba Konferénsia Nasionál no Internasionál Forum Diálogu Dili, ne’ebé tuir planu sei hala’o durante loron rua, hahu iha loron 25/08/2022.
Conselho de Imprensa mós husu Prezidente Eleitu nia apoiu hodi halo advokasia ho órgaun soberania sira seluk, nune’e bele desidi loron 16 fulan Outubru, nu’udar loron nasionál liberdade imprensa.
Figura numeru dahuluk iha Conselho de Imprensa, konvida Prezidente Eleitu atu partisipa nafatin iha Komemorasaun Trajédia Balibo, iha loron 16 fulan Outubru tinan 2022, ne’ebé kada tinan CI sempre hala’o iha Postu Administrativu Balibo Munisípiu Bobonaro. Aleinde ne’e, CI mós husu antigu jornalista ne’e atu halo advokasia hodi apoiu mídia konvensionál sira. (CI)