Díli – Iha loron 24 Janeiru 2022, prezidente Conselho de Imprensa de Timor-Leste (CI), Virgílio da Silva Guterres dispensa husi nia kna’ar nu’udar Prezidente CI hodi ba konkore iha eleisaun prezidensiál períodu tinan 2022-2027 nu’udar kandidatu independente.
Haktuir iha estatutu Conselho de Imprensa iha artigu 23 kona-ba eleisaun prezidente nian, iha alinea 5 haktuir bainhira kargu prezidente nian laiha ema ida maka okupa maka sei hili entre membru na’in hira ne’e ida ne’ebé katuas liu hodi sai prezidente interinu.
Durasaun husi dispensa kna’ar prezidente CI durante fulan tolu, hahú husi 24 janeiru 2022 to’o 24 abril 2022. Durante aujénsia, Konsilleiru Expedito Loro Diaz Ximenes maka toma pozisaun nu’udar Prezidente Interinu Conselho de Imprensa.
Nune’e, iha loron 25 Abril 2022, Konselleiru Virgílio da Silva Guterres retoma hikas nia pozisaun nu’udar Prezidente Conselho de Imprensa tuir mandatu difinitivu ba períodu tinan 2021-2025.
Tanba ne’e, iha loron 25 Abril 2022, Conselho de Imprensa realiza konferensia imprensa ida iha salaun enkontru CI, Quintal Boot, Díli, hodi fó hatene ba públiku kona-ba dispesaun kna’ar prezidente CI Virgílio da Silva Giterres remata ona no hahú hikas hala’o ninia kna’ar hanesan bainbain.
Prezidente CI, Virgílio Guterres hato’o agradese wa’in ba konselleiru Expedito Loro Dias Ximenes ne’ebé durante fulan tolu lidera Conselho de Imprensa hodi garante nafatin funsionamentu órgaun reguladora refere.
“Hakarak hato’o ha’u nia apresiasaun maka’as ba maun konselleiru Expedito ne’ebé durante fulan tolu nia laran tenke asumi responsabilidade ne’ebé boot iha Conselho de Imprensa, hodi kontinua tau matan no prejide plenária, halo enkontru ho ezekutivu atu mantein serbisu Conselho de Imprensa ninian,” haktuir prezidente CI, Virgílio da Silva Guterres.
“Dia 25 Abril, loron Liberdade ninian ne’ebé Timor hetan, ha’u hahú fali assume ha’u nia kargu hanesan prezidente Conselho de Imprensa,” dehan Virgílio Guterres hodi hato’o ba públiku liuhusi konferensia imprensa hodi reafirma nafatin nia pozisaun hodi luta ba liberdade imprensa no liberdade espresaun iha Timor-Leste.
Iha sorin seluk, konselleiru Expedito Loro Dias Ximenes hatete Conselho de Imprensa fó dispensaun ba Prezidente CI, Virgílio da Silva Guterres hodi konkore iha eleisaun presidensiál.
“Ita hotu akompaña maun Virgílio Guterres, nia tuir konkorénsia eleisaun prezidensiál no dispensaun ne’ebé Conselho de Imprensa fó ba irmão Virgílio durante fulan tolu no ohin loron 25 Abril, maun Virgílio hala’o fali kna’ar hanesan prezidente Conselho de Imprensa,” esplika Konselleiru Expedito. (CI)