Díli – Conselho de Imprensa de Timor-Leste (CI), serbisu hamutuk ho Dewan Pembina Perkumpulan Untuk Pemilu dan Demokrasi (PERLUDEM) no Facebook realiza workshop kona-ba “Kombate Disinformasaun Eleitorál iha Timor-Leste”.
Workshop durante loron rua liuhusi plataforma online Zoom, hahú husi 12-13 Abril 2022, ne’ebé hala’o iha salaun konferénsia Centro Nacional Chega! I.P, antigu komarka Balide Díli, abertura husi Sekretáriu Estadu Komunikasaun Sosiál, Merício Juvinal dos Reis Akara, nu’udar representante Ministru Asuntus Parlamentares no Komunikasaun sosiál.
Objetivu husi workshop ne’e maka, primeiru, oinsá maka bele kombate disinformasaun iha Timor-Leste, segundu, iha futuru bele serbisu hamutuk ho Facebook hodi kombate mós disinformasaun iha Timor-Leste.
Diretór Ezekutivu CI, Rigoberto Monteiro, hatete liuhusi workshop ida ne’e mós oinsá bele rekomenda ba facebook atu konsidera lian tetun iha Plataforma lingua media sosiál ninian, atu nune’e bainhira ema ko’alia liafuan at iha facebook, sira bele akapta hodi kontrola no monitoriza.
Conselho de Imprensa espera katak rezultadu husi workshop ne’e maka “bele hamosu Plataforma entedimentu ida hanesan” para oinsa bele lori CI no Facebook kontinua hala’o diskusaun iha tempu sira tuir mai hodi hamosu kooperasaun ida.
“Ami ko’alia ho Meta Facebook Jakarta, PERLUDEM ne’ebé promove demokrasia iha Indonézia, halo inisiativa workshop ida ne’e, atu lori ami halo diskusaun hodi konklui ho posibilidade ka lae atu hamosu entendimentu hanesan entre Conselho de Imprensa ho Facebook atu bele dezenvolve kooperasaun ida,” esplika diretór Ezekutivu, Rigoberto Monteiro.
Partisipa iha workshop ne’e, Sekretáriu Estadu Komunikasaun Sosiál, Prezidente Interinu Conselho de Imprensa, Diretór Ezekutivu CNC! I.P, Diretór Ezekutivu CI, Estudante universitáriu sira, Jornalista.
Diskusaun durante loron rua ne’e, oradór nasionál sira maka hanesan Sekretáriu Estadu Komunikasaun Sosiál, Merício Juvinal dos Reis Akara, Prezidente Interinu Conselho de Imprensa, Expedito Loro Dias Ximenes, Prezidente AJTL, Zevonia Vieira, Prezidente TLPU, Candido Alves, Prezidente Alumni Parlamentu Foinsa’e Timor-Leste, Zaulino da Silva, Diretór ezekutivu CI, Rigoberto Monteiro.
Oradór husi Indonézia maka hanesan Konsellu Supervizaun Facebook, Endy Bayuni, Diretora Ezekutiva PERLUDEM, Khoirunnisa N. Agustyati, Xefe APAC-Meta, Alice Budisatrijo, Co-Fundador no Espesialista Verifikasaun Fakto – MAFINDO, Aribowo Sasmito, Prezidente Aliansa Jornalista Independente Indonézia (AJI), Sasmito Madrim, Jerente Polítika Publika-Meta, Karissa Agripinna, Jerente Asosiasaun Divulgasaun Polítika no Governamentais – Meta, Dara Nasution no Consultant CI Unit – UNESCO, Hesthi Murthi. (CI)