Díli – Sesta-feira, 25 Marsu 2022, Conselho de Imprensa de Timor-Leste (CI) renova hikas nota entendimentu ho Radio Televizaun Timor-Leste, Empreza Públika (RTTL, EP), ba perídu tinan ida tan, iha salaun CI, Quintal Boot-Díli.
Kooperasaun ho durasaun tinan ida ne’e, RTTL, EP sei fó espasu ida ba Conselho de Imprensa atu bele publika programa ka pakote sira CI nian liuhusi programa “Liberdade Imprensa Ha’u Nia Liberdade”.
Prezidente Interinu Conselho de Imprensa de Timor-Leste, Expedito Loro Dias Ximenes hatete Conselho de Imprensa deside atu renova hikas nota entendimentu ne’e ho RTTL, EP tanba instituisaun rua ne’e nu’udar entidade estadu nian atu promove Liberdade Imprensa no Liberdade espresaun iha Timor-Leste.
“Programa ida naran Liberdade Imprensa Ha’u Nia Liberdade, atu haforsa liutan kna'ar Conselho de Imprensa nian ne’ebé hatuur iha lei komunikasaun sosiál nomós dekretu lei ne’ebé hatuur kriasaun Conselho de Imprensa nian atu bele promove Liberdade Imprensa no Liberdade Espresaun,” esplika Prezidente Interinu, Expedito Loro Dias Ximenes.
Prezidente Conselho Administrasaun RTTL, EP, José António Belo hato’o agradese wa’in ba apoiu tomak Conselho de Imprensa nian iha tinan 2021, mezmu hasoru difikuldade oioin maibé konsege ezekuta.
“Ami agradese ho kooperasaun ida ne’e, ne’e la’ós kooperasaun foun maibé kontinuasaun husi kooperasaun ne’ebé ejiste tiha ona. Espasu nafatin iha ba Conselho de Imprensa iha kualker momentu bele uja espasu sira iha RTTL, EP hodi bele disemina ka fo sai informasaun ba públiku,” hatete Prezidente RTTL, EP, José António Belo.
Haktuir iha planu asaun anuál Conselho de Imprensa ba tinan 2022, Diresaun Komunikasaun Sosiál, Relasaun Institusionál no Kooperasaun, liuhusi Unidade Produsaun no Mídia sei produs no públika ona iha RTTL, EP, pakote dokumentáriu no informative, inklui debate televizivu hamutuk 14.
Partisipa iha serimónia ne’e, Prezidente Interinu Conselho de Imprensa no membru sira, Prezidente RTTL, EP ho nia ekipa ezekutivu, Diretór Ezekutivu CI ho estrutura tomak. (CI)