Díli, 22/02/2022 – Conselho de Imprensa de Timor-Leste (CI) ho Ajénsia Programa Nasoens Unidas ba dezenvolvimentu (PNUD/UNDP) hala’o lansamentu “Matadalan Reportájen Eleitorál” ba Jornalista no Meiu Komunikasaun Sosiál Sira, iha salaun enkontru CI, Quintal Boot, Díli.
Projetu Dezenvolve Matadalan Reportájen Eleitorál ne’e mai husi serbisu hamutuk entre Conselho de Imprensa de Timor-Leste no Ajénsia Programa Nasoens Unidas ba dezenvolvimentu no hetan apoiu husi Governu Japaun.
Prezidente Interinu Conselho de Imprensa de Timor-Leste (CI), Expedito Loro Dias Ximenes hatete “Matadalan Reportájen Eleitorál” nu’udar guia ida hodi regula jornalista no meiu komunikasaun sosiál sira atu bele evita ka hadok husi informasaun falsu (HOAX).
“Matadalan ne’e atu regula ita atu evita informasaun ne’ebé hala’i ba HOAX, informasaun ne’ebé bazeia de’it ba rumoris ka isu. Ita hanesan ema profesionál, sidadaun hotu fó fiar atu oinsá ita bele fó informasaun ida ne’ebé pas, edukativu no konstrutivu ba ita nia nasaun,” esplika konselleiru Expedito.
Prezidente interinu Conselho de Imprensa, Expedito Loro Dias Ximenes hato’o agradese wa’in ba UNDP no Governu Japaun tanba bele serbisu hamutuk ona ho Conselho de Imprensa ba dezenvolve matadalan ida ne’e.
Iha fatin hanesan, Project Manager Core TL, UNDP, Tito Filipe hatete, tinan ida ne’e, ita iha eleisaun, iha kompetividade as tebes, nomós mai kedan ho projetu Dezenvolve Matadalan Reportájen Eleitorál maka UNDP hakarak apoiu Conselho de Imprensa hanesan parseiru tradisionál tiha hahú kedas iha ejisténsia Conselho de Imprensa nian to’o ohin loron.
“UNDP ho apoiu Japaun, ita parseria ho Conselho de Imprensa tanba ami hatene katak iha projetu UNDP nian ida oinsá maka bele ajuda mídia sira para halo reportájen ida ne’ebé balansu, halo reportájen ida ne’ebé maka iha sensitividade ba asuntu eleitorálsira iha nasaun ida ne’e,” esplika Tito Filipe.
Atividade lansamentu “Matadalan Reportájen Eleitorál” hala’o liuhusi biban Forum Editoriál. Partisipa iha lansamentu ne’e, Prezidente Interinu Conselho de Imprensa, Konselleiru Expedito Loro Dias Ximenes, Project Manager Core TL, UNDP, Tito Filipe, Diretór Ezekutivu CI, Rigoberto Monteiro, Asosiasaun Mídia, Diretores Informasaun Mídia, Xefe Redasaun, Editór, Kordenadór Kobertura no jornalista sira. (CI)