Díli – Iha loron 19 Marsu 2022, Timor-Leste sei realiza eleisaun prezidensial ba períodu tinan 2022-2027. Iha ámbitu eleisaun, Conselho de Imprensa de Timor-Leste (CI) serbisu hamutuk ho Serbisu Tékniku Administrasaun Eleitorál (STAE) hodi fasilita votu ambulante ba jornalista sira ne’ebé hala’o kobertura iha eventu eleisaun prezidensial nune’e bele fasilita di’ak liutan serbisu jornalista nian iha terenu hodi bele fornese informasaun ba públiku.
Ofisiálmente, Conselho de Imprensa ho STAE entrega direta kartaun kredensial ba jornalista sira liuhusi responsável Órgaun no Meiu Komunikasaun Sosiál iha molok tama ba loron eleisaun nian.
Atividade entrega kartaun kredensiál vota movel ba jornalista sira, hala’o iha loron sesta-feira, 11 Marsu 2022, iha salaun enkontru Conselho de Imprensa, Quintal Boot, Díli.
Prezidente Interinu Conselho de Imprensa, Expedito Loro Dias Ximenes hatete Conselho de Imprensa serbisu hamutuk ho STAE maka fasilita kartaun kredensiál vota movel ne’e ba jornalista sira. Prezidente interinu ne’e mós apela ba jornalista sira bainhira halo kobertura iha baze maka hetan buat ruma bele komunika ba Conselho de Imprensa.
“Ohin ita hamutuk iha ne’e atu simu kartaun kredensial movel, ne’e dehan katak hahú ohin kolega sira halo kobertura iha ne’ebé de’it, liu-liu iha loron 19 kolega sira uja kartaun ida ne’e bele vota iha ne’ebé de’it,” esplika Prezidente Interinu Conselho de Imprensa, Expedito Loro Dias Ximenes.
Konselleiru Expedito husu ba jornalista sira atu nafatin respeita kódigu étika jornalizmu nian nomós hatudu onestidade atu ejerse votu dala ida de’it iha fatin ida no labele uja kartaun kredensiál atu vota dala rua.
Conselho de Imprensa, nu’udar entidade administrativa independente ne’ebé atua ba-iha setór komunikasaun sosiál nian, defini tiha ona iha Lei Komunikasaun Sosial nu. 5/2014, loron 19, fulan novembru, no Dekretu-Lei nu. 25/2015, iha loron 5, fulan agustu, kona-ba kriasaun Conselho de Imprensa no aprovasaun ba nia Estatutu.
Misaun Conselho de Imprensa nian ida mak oinsá bele tau matan ba órgaun no meiu komunikasaun sosiál sira nomós jornalista hotu ne’ebé hala’o kna’ar hodi promove liberdade imprensa no liberdade espresaun iha Timor-Leste.
Partisipa iha atividade atribuisaun kartaun kredensiál vota movel, Prezidente Interinu Conselho de Imprensa, diretores órgaun no meiu komunikasaun sosiál, xefe redasaun, editor no jornalista sira. (CI)