Dili – Iha atividade Forum Editoriál daruak, Conselho de Imprensa de Timor-Leste (CI) serbisu hamutuk ho Unidade de Informasaun Finanseira (UIF) hodi halo sensebilizasaun rejime juridiku kona-ba brankamentu kapitál no Finansaimentu terismu.
Forum Editoriál nu’udar programa prinsipal ida husi Conselho de Imprensa iha ne’ebé fó espasu ba CI ho nia parseiru ka stakeholders prinsipal sira mak hanesan Mídia Na’in, Asosiasaun Jornalista, Xefi Redasaun, Editór, Responsável Órgaun no Meius Komunikasaun Sosiál sira hodi diskuti hamutuk kona-ba asuntu oioin.
Prezidente Interinu CI, Expedito Loro Dias Ximenes, hateten objetivu enkontru ne’e atu mídia no jornalista sira bele hatene rejime juridiku kona-ba brankamentu kapitál no Finansaimentu terismu inklui termus linguajen teknika wainhira hakerek notisia.
“Enkontru ne’e atu hadia Mídia nia kualidade no obra jornalistika iha parte kapasidade profesionál, teknika no intelektuál,” esplika Ezpedito Dias Ximenes, durante abertura Forum Editoriál daruak, iha salaun enkontru CI, quinta-feira, 17/02/2022.
Iha enkontru ne’e, Diretora Ezekutiva Unidade Informasaun Finanseira (UIF), Maria José J. Sarmento, agradese oportunidade ba realiza enkontru ne’e no apresia CI nia servisu, “Ami louva CI nia servisu durante ne’e hodi asegura liberdade imprensa no liberdade espresaun,” hateten Jestora UIF.
Maria Jos’e J. Sarmentu esplika katak, Maske finansiamentu UIF tama iha estrutura Banco Centrál maibé unidade ne’e nu’udar orgaun independenti hodi foti disizaun tuir sira nia knar seim intervensaun hosi Banco Centrál no instituisaun seluk.
Iha oportunidade ne’e, Diretora Informasaun Ajénsia Tatoli, IP, Rita Almeida, agradese tanba enkontru ne’e aumenta sira nia koñesimentu kona-ba kna’ar UIF nomós oinsá halo kobertura kona-ba asuntu brankamentu kapitál no finansiamentu terorizmu.
Iha diskursu enseramentu Diretór Ezekutivu CI, Rigoberto Monteira, UIF sai nu’udar fontes kredivel ba Mídia liga ho asuntus brankamentu kapitál no finansiamentu terorismu.
CI mos disponivel servisu hamutuk ho UIF iha futuru hodi realiza konferensia nasional no internasionál inklui kria matadalan ka termu teknika kobertura liga ho kasu krime finanseira.
Partisipa mos iha Forum Editoriál daruak ne’e maka hanesan, Prezidente AJTL, Zevonia Maria Vieira, Prezidenti TLPU, Candido Alves, Nain ba Mídia Bisniss Timor, José Maria Ximenes, Xefi Redasaun nomós jornalista sira. (CI)