Díli – Iha loron 10 Fevereiru 2022, Conselho de Imprensa de Timor-Leste (CI) hala’o lansamentu Planu Estratéjiku CI nian ba períodu 2022 -2026, iha salaun enkontru CI, Quintál Boot, Díli.
Prezidente Interinu Conselho de Imprensa de Timor-Leste, Expedito Loro Dias Ximenes hatete, planu estratéjiku períodu 2022 -2026 nu’udar padraun no matadalan ba orienta lala’ok serbisu Conselho de Imprensa nian durante tinan lima ba oin.
“Husi rezultadu workshop elaborasaun planu estratéjiku Conselho de Imprensa utiliza atu orienta serbisu instituisaun nian,” esplika Konselleiru Expedito bainhira lansa planu estratéjiku, iha salaun enkontru CI, Quintál Boot Díli.
Konselleiru Expedito dehan, durante estabele Conselho de Imprensa ho limitasaun rekursu no dezafiu oioin maibé la hamate espíritu atu garante, asegura no defende Liberdade imprensa no Liberdade espresaun iha Timor-Leste ne’ebé hatudu mós progresu balun.
Sekretáriu estadu Komunikasaun Sosiál (SEKOMS), Mericio Juvinal dos Reis Akara, lori Governu nia naran hato’o parabens ba Conselho de Imprensa ne’ebé konsege formaliza planu estratéjiku ba períodu 2022 -2026.
Akara dehan planu estratéjiku ne’e importante tanba nu’udar matadalan ba instituisaun atu la’o tuir. Ho planu estratéjia bele ajusta di’ak liutan programa sira kada tinan.
“Ha’u hanoin Conselho de Imprensa halo nia planu estratéjiku di’ak loos, refleta ita nia vizaun no espíritu hari nasaun tanba konstituisaun artigu 40 no 41 garantia Liberdade imprensa no Liberdade espresaun,” Louva Akara.
Atu melloria liutan dezempeñu servisu Conselho de Imprensa de Timor-Leste nian, Plenaria Conselho de Imprensa de Timor-Leste data 25 Outubru 2021 akta Nú 39/CI/X/2021 deside no autoriza orgaun ezekutivu CI elabora planu estratéjiku ba periódu 2022 – 2026.
Workshop elaborasaun planu etratéjiku Conselho de Imprensa de Timor-Leste nian ne’e hala’o iha Salaun Madre Carmelita, Maubara, Munisípiu Liquica, durante loron lima, entre data 13 -17 Dezembru 2021, ne’ebé partisipa hosi Prezidente no Membru Conselho de Imprensa de Timor-Leste, Fiskál Úniku, Kargu Diresoens no Xefias, nomós ofisiais hosi orgaun ezekutivu.
Dokumentu ida-ne’e nu’udar kompilasaun hosi prosesu no rezultadu workshop elaborasaun planu estratéjiku Conselho de Imprensa de Timor-Leste refere, utiliza ba orienta servisu organizasaun ninian durante períodu 2022 – 2026, hafoin hetan omologasaun hosi parte plenaria CI no publika iha jornál da repúblika.
Serimonia ne’e hahu ho introdusaun hosi Diretór Ezekutivu CI, Rigoberto Monteiro, hodi koalia kona-ba esforsu ne’ebé parte Ezekutivu CI halo no hetan apoiu tekniku Centro Nacional Chega hodi elabora no finaliza planu estratejiku ne’e, iha Maubara.
Hafoin lasamentu kuntinua kedas hodi entrega simbolikamente Planu Estratéjiku CI Períodu 2022 – 2026, ba representante parseiru CI nian ne’ebé marka precensa iha serimonia ne’e.
Partisipa iha atividade lansamentu planu estratéjiku ne’e, Sekretáriu Estadu Komunikasaun Sosiál (SEKOMS), Mericio Juvinal dos Reis Akara, Prezidente Interinu CI, Expedito Loro Dias Ximenes ho membru Conselho de Imprensa sira, reprezentante husi órgaun parseiru sira hanesan PNTL, SERVE.IP, ANC, CEFTEC, CFP, DGPO-MoF, UPMA, TLPU, CNC, Jornalista sira inklui mós estrutura tomak Ezekutivu Conselho de Imprensa. (CI)