Díli – Iha inísiu tinan 2022, fulan fevereiru, Conselho de Imprensa de Timor-Leste (CI), realiza Kolókiu Públiku ba estajiáriu karteira profesionál sira hodi hakle’an koñesimentu tékniku no linguístiku estajiáriu sira nian, nune’e sira bele hetan koñesimentu kona-ba rejime jurídiku komunikasaun sosiál, direitu no devér natureza legál nian inklui étika profisaun jornalista nian.
Kolókiu Públiku nu’udar espasu esensiál no mekanizmu importante ida atu esplika modul no materia oioin kona-ba jornalizmu no papel mídia nian hodi kontribui ba prosesu demokratizasaun iha rai laran.
Objetivu seluk husi Kolókiu Públiku maka atu introdus materia ka modul sira ba estajiáriu, hakle’an no hametin abilidade jornalízmu estajiáriu sira nian nomós hametin relasaun entre estajiáriu sira ho Conselho de Imprensa no kanál mídia sira.
Iha abertura, membru Conselho de Imprensa, Konselleiru Francisco Belo Simões da Costa hato’o benvindu ba maluk jornalista estajiariu sira ne’ebé hola parte iha atividade kolókiu públiku.
Konselleiru dehan liuhusi kolókiu públiku ida ne’e maka bele ajuda hodi hadi’a koñesimentu estajiáriu sira nian bainhira hala’o kna’ar jornalízmu ne’e rasik.
“Ha’u espera katak, ho kolókiu ida ne’e kolega sira bele fokus, tanba materia sira iha kolókiu públiku ne’e rasik maka sei sai iha ejame karteira profesionál. Entaun foku iha kolókiu ida ne’e atu nune’e to’o iha ejame karteira profesionál karik labele hetan valor ne’e monu,” esplika Konselleiru Francisco bainhira hala’o abertura ba atividade Kolókiu Públiku ne’ebé realiza iha salaun enkontru Conselho de Imprensa, Quintal Boot, Díli, tersa-feira (08/02/2022).
Partisipantes ba kolókiu públiku hamutuk na’in 20 husi instituisaun mídia sira hanesan Grupu Mídia Nasionál (10), Naunil Mídia (3), Timor Post (1), Dili Post (1), RTTL,ep (1), STL (3) no Rádiu Komunidade Comoro (1).
Modul ka materia hamutuk 10 ne’ebé sei aprezenta ba estajiáriu sira maka hanesan editoriál management, papel mídia hodi harii demokrasia, papél mídia hodi prezerva memória, lei komunikasaun sosiál no kódigu penál, jornalízmu ho prespetiva jéneru, papél mídia hodi promove direitu umanu, jornalízmu ambientál, jornalízmu páz, element 10 jornalízmu nian no étika jornalízmu.
Kolókiu Públiku hala’o durante loron 8, hahú husi loron 08 ate 25 Fevereiru 2022. Oradór ba kolókiu Públiku ne’e rasik mai husi membru Conselho de Imprensa, kargu Ezekutivu, nomós oradór bainaka balun husi entidade relevate sira seluk. (CI)