Díli - Kada tinan Conselho de Imprensa de Timor-Leste (CI) mós iha ninia atividade halo enkontru editoriál ka Forum Editoriál ho ninia stakeholders mak hanesan Mídia Na’in, Asosiasaun Jornalista, Xefi Redasaun, Editór, Responsável Órgaun no Meius Komunikasaun Sosiál sira.
Ba tinan ne’e, iha loron Kinta feira, 03 fevereiru 2022, Conselho de Imprensa de Timor-Leste, realiza forum editoriál dahuluk iha salaun enkontru Conselho de Imprensa, Quintal Boot, Díli.
Enkontru editoriál ka forum editoriál dahuluk, Conselho de Imprensa organiza hodi konvida Sekretariadu Tékniku Administrasaun Eleitorál (STAE) hodi hato’o informasaun kona-ba akreditasaun no vota movel ba jornalista sira iha prosesu eleitorál, liga ho eleisaun Prezidensiál ne’ebé tuir planu sei hala’o iha loron 19 fulan Marsu tinan 2022.
Iha abertura, Prezidente Interinu Conselho de Imprensa, Expedito Loro Dias Ximenes hatete, Conselho de Imprensa fó hanoin nafatin ba jornalista sira katak durante períodu kampaña eleitorál to’o eleisaun, jornalista hotu nafatin hamrik metin tuir prinsípiu kódigu étika jornalízmu nian.
“Bele mosu dezafius no obstakulus, ita hamutuk nafatin ho bandeira étika jornalízmu nian nune’e ita hamutuk bele lori naran di’ak husi ita idak-idak nia mídia,” esplika Konselleiru Expedito Loro Dias Ximenes. Nia mós husu atu jornalista no mídia hotu atu hamutuk salva imparsialidade.
Entretantu Diretór Ezekutivu CI, Rigoberto Monteiro dehan objetivu husi enkontru maka oinsá Conselho de Imprensa ho STAE bele esplika ba mídia na’in, jornalista no editór kona-ba oinsá maka jornalista sira bele hetan direitu ba votu ambulante.
Xefe Departamentu Informasaun Públika no Relasaun Externa (IPRE), Marquita Imaculada da Costa hato’o agradese wa’in ba Conselho de Imprensa tanba bele fó oportunidade atu STAE bele mai esplika teknikamente kona-ba oinsá maka bele hetan akreditasaun ba votu ambulante.
Marquita esplika mídia idak-idak sei hato’o lista jornalista sira nian ba Conselho de Imprensa nune’e bele enkamiña hikas lista hirak ne’e ba STAE hodi hetan akreditasaun.
Xefe Departamentu ne’e dehan kuandu jornalista sira hetan ona akreditasaun husi STAE maka sei bele vota iha fatin ne’ebé de’it.
Tarjetu husi enkontru ne’e, partesipantes hamutuk na’in 50, mai husi Na’in ba Mídia, Diretór Informasaun, Xefe Redasaun, Editór, Korespondente nomós Asosiasaun Jornalista sira. Alein de ne’e, marka mós prezensa husi STAE nomós Prezidente Interinu Conselho de Imprensa no Diretór Ezekutivu CI.