Díli – Conselho de Imprensa de Timor-Leste (CI), fasilita formasaun ba ofisiál Relasaun Públika Polísia Nasionál Timor-Lorosa’e (PNTL), hamutuk ema na’in 30 husi Munisípiu 12 inklui Reziaun Autónoma Espesiál Oecussi Ambeno (RAEOA).
Atividade ne’e hala’o durante loron rua, hahú husi loron 02-03 fevereiru 2022, iha auditorium Sentru Formasaun Polísia (CFP-Sigla Portugés), Comoro, Díli.
Hafoin abertura, Membru Conselho de Imprensa de Timor-Leste (CI), Konselleiru Otelio Ote hatete, tuir CI nia hare katak, formasaun ne’e importante tebes ba membru PNTL sira, liu-liu sira ne’ebé hola parte iha komunikasaun sosiál, hodi hatene didi’ak kona-ba saída maka importánsia husi komunikasaun sosiál iha instituisaun PNTL.
“Durante ne’e jornalista ho PNTL maka besik malu loos. Ho formasaun ida ne’e, ita nia maluk polísia sira bele entende didi’ak oinsa bele utiliza informasaun lalais liu no kredivel, nune’e sira bele counter informasaun sira ne’ebé iha públiku karik laloos,” esplika Konselleiru Otelio Ote.
Komandante Sentru Formasaun Polísia, Superintendene Xefe Polísia, Arquimino Ramos hatete formasaun ba relasaun públika PNTL ne’e importante atu bele oinsá fahe informasaun ba komunidade nomós oinsá bele encounter informasaun ne’ebé la’o iha públiku.
Konseitu mídia PNTL adopta prinsípiu rua importante, primeiru, pro ativu katak oinsá maka PNTL bele fahe informasaun, hala’o sosializasaun kona-na atividade prevensaun sira, segundu, re ativu katak mídia PNTL oinsá maka responde insidente ne’ebé la’o tiha ona, ita tenke responde hodi fahe informasaun públiku nune’e labele hela ho dúvida.
Conselho de Imprensa hetan oportunidade atu bele fasilita formasaun ho matéria rua maka hanesan, enkuadramentu legál Conselho de Imprensa ho nia kompeténsia sira, fasilita husi Diretór DRAJ, Zenilton Zeneves.
Enkuantu Diretór DADM, Alberico da Costa Junior fasilita formasaun kona-ba saidá maka relasaun públika ho nia papél sira nomós jornalízmu báziku. (CI)