LACLUBAR, 27/01/2022_ Konselleiru Conselho de Imprensa de Timor-Leste (CI), Otelio Ote sai Panelista ba Treinamentu konaba Literasia Dijitál, ho tema, “Foin Sa’e nia Asaun ba Prevene Violénsia Bazeia ba Jéneru iha Espasu Online”.
Treinamentu ne’e organiza hosi Grupu Voice for Voiceless , apoiu hosi UN WOMEN (Ajensia Nasoens Unidas ba Asuntu Feto no Labarik), no hetan fundus hosi Governu Australia, ne’ebé hala’o iha Postu Administrativu Laclubar, Munisípiu Manatuto durante loron rua (26-27 Janeiru 2022).
Reprezentante Conselho de Imprensa de Timor-Leste (CI), Konselleiru Otelio Ote, iha nia esplikasaun bainhira sai Panelista, ko’alia liu ba Conselho de Imprensa nia ezisténsia ho nia kna’ar importante sira ne’ebé durante ne’e hala’o.
“Conselho de Imprensa hari’i ho nia kna’ar importante mak atu proteje Liberdade Imprensa no Liberdade Espresaun, atu garantia mós Kualidade Jornalízmu, no Jornalista hotu tenke hakerek bazeia ba Kódigu Étika Jornalístika”, esplika Konselleiru.
Konselleiru Ote mós dehan, CI tau matan de’it ba órgaun no meiu komunikasaun sosiál sira ne’ebé rejistu iha Conselho de Imprensa de Timor Leste.
Tuir nia, Frekuénsia meiu komunikasaun sosiál sira hanesan Facebook, WhatsApp, no seluk tan sai ameasa boot ida ba meius komunikasaun sosiál profesionál sira ne’e.
Konselleiru mós fó hanoin ba partesipantes sira katak, atu sai Jornalista no hakarak hakerek tuir Padraun Jornalista nian, tenke kaer Prinsipiu ida hanaran 5W+1H (What, Who, Why, Where, When and How (Saída mak akontese, See mak involve, Tanba sa, Iha ne’ebé, bainhira no Oinsá mak akontese).
Iha oportunidade ida ne’e mós Konselleiru esplika kona-ba Lei sira ne’ebé regula Informasaun Falsas sira iha mídia sosiál ba partisipantes sira ne’e.
Atividade ne’e ho objetivu atu aumenta joven sira ninia koñesimentu kona-ba literasia dijitál, atu partisipantes sira lori impaktu pozetivu liu hosi mídia sosiál iha moris lor-loron nian ho atetude ne’ebé maka bele influénsia asaun pozetivu.
Partisipantes iha atividade ne’e, mai husi Estudantes no Grupu Juventude sira iha Postu Administrativu Laklubar, Munisípiu Manatuto, hamutuk ema 40 Resin. (CI)