Díli – Prezidente Conselho de Imprensa de Timor-Leste (CI), Vergílio da Silva Guterres sai nu’udar oradór iha semináriu kona-ba hari’i paz iha Timor-Leste, ne’ebé organiza husi G7+ iha Postu Administrativu Venelale, Munisípiu Baucau.
Iha semináriu hari’i paz iha Timor-Leste ho tema “Lori Mundu Mai Venilale”, Prezidente CI, Vergílio da Silva Guterres ko’alia kona-ba papél mídia nian ba kontribuisaun paz iha nasaun ne’e.
“Pesoalmente agradese ba konvite husi G7+ ne’ebé fó ba ha’u, alein de hanesan Venilale oan, hanesan mós Prezidente Conselho de Imprensa, atu mai fahe hanoin ruma ho autoridade no komunidade sira iha Postu Administrativu Venilale kona-ba papél mídia ni’an,” esplika Prezidente CI, iha semináriu ho tema “Lori Mundu Mai Venilale”, iha salaun enkontru Postu Administrativu Venilale, sábadu (22/01/2022).
Figura númeru dahuluk iha CI ne’e, orgullu tanba bele partisipa iha semináriu refere hodi fó hanoin ba komunidade no autoridade lokál sira kona-ba papél mídia nian, atu kontribui ba oinsá maka bele lori mundu mai Venilale no lori Venilale ba mundu.
G7+ nia misaun mak oinsá bele hari’i paz no estabilidade nomós enkoraja malu entre nasaun membru sira ba hari’i dezenvolvimentu.
Partisipa mós iha atividade ne’e mak hanesan, Vise Prezidente Parlamentu Nasionál, Luis Roberto, Sekretáriu Jerál G7+, Helder da Costa, Reprezentante Administradór Postu Venilale, Xefe Suku sira, Relijioja sira, Joventude no Estudante sira. (CI)