Díli – Plenária ordináriu Conselho de Imprensa de Timor-Leste (CI), segunda-feira ne’e (24/01/2022), aprova pedidu dispensaun ne’ebé hato’o husi Prezidente Conselho de Imprensa, Virgílio da Silva Guterres.
Ho aprovasaun ne’e, Prezidente Conselho de Imprensa, Virgílio da Silva Guterres, sei aujente nia funsaun durante fulan tolu (3), hahú husi loron 24 Janeiru no sei termina iha loron 24 Abril 2022, hodi konkore nu’udar kandidatu ida iha eleisaun Prezidensiál ne’ebé tuir planu sei realiza iha loron 19 fulan Marsu tinan ne’e.
Hafoin remata plenaria ordináriu, Virgílio da Silva Guterres hamutuk ho Membru sira anúnsia kedas aprovasaun pedidu dispensaun ne’e, liuhusi konferénsia imprensa ne’ebé hala’o iha salaun plenária CI, Quintal Boot, Díli, segunda-feira (24/01/2022).
“Hato’o ba públiku katak, hahú ohin ba to’o Abril, eleisaun ne’e hotu ha’u sei dispensa ha’u nia funsaun hanesan Prezidente Conselho de Imprensa,” esplika, Virgílio da Silva Guterres.
Haktuir iha estatutu Conselho de Imprensa, artigu 23 iha Alinea 5 hatete, bainhira kargu Prezidente CI nian laiha ema ida maka okupa, maka sei hili entre membru na’in hira ne’e ida ne’ebé katuas liu hodi sai Prezidente CI interinu.
Ho baze legál refere, maka liuhusi plenáriu ordináriu aprova no deside, konselleiru Expedito Loro Dias Ximenes, hodi asumi responsabilidade nu’udar Prezidente Conselho de Imprensa interinu durante fulan tolu. (CI)