Díli – Kinta-feira, 20 Janeiru 2022, Diretór Ezekutivu Conselho de Imprensa de Timor-Leste (CI), Rigoberto Monteiro hala’o enkontru ho Xefe Asuntu Públiku Embaixada Estadus Unidos Amerika, Tim Johnson.
Durante audiénsia, Conselho de Imprensa no Embaixada EUA ko’alia kona-ba progresu no dezafiu ba implementasaun akordu serbisu hamutuk iha área Basic Online Fact Checking Training.
Conselho de Imprensa liuhusi Diretór Ezekutivu, aprezenta rezultadu implementasaun Basic Online Fact Checking Training, ne’ebé hala’o ba estudante universitáriu lima (5), maka hanesan Universidade Marista Baucau, Universidade Dili (UNDIL), Universidade da Paz (UNPAZ), East Timor Coffe Institute Ermera no Institute Politecnic Betano, IPB.
Conselho de Imprensa mós sei entrega relatóriu implementasaun atividade Basic Online Fact Checking Training ba embaixada Estadus Unidos Amerika iha tempu besik.
Xefe Asuntu Públiku Embaixada Estadus Unidos Amerika, Tim Johnson agradese ba Conselho de Imprensa tanba bele implementa artividade Basic Online Fact Checking Training ho di’ak tebes.
Conselho de Imprensa ho Embaixada EUA diskuti mós kona-ba kontinuasaun ba kooperasaun entre instituisaun rua refere iha Basic Online Fact Checking Training nomós ba futuru atu implementa Sistema monitorizasaun ba Plataforma online sira.
Basic Online Fact Checking Training realiza iha universidade lima (5) maka hanesan Instituto Católico Para Formação de Professores (ICFP), Marista Baucau, Universidade Dili (UNDIL), Universidade da Paz (UNPAZ), East Timor Coffe Institute Ermera no Institute Politecnic Betano, IPB, ho total partesipantes 250, feto 118 no mane 132.
Formasaun ba Instituto Católico Para Formação de Professores (ICFP), Marista Baucau, hala’o iha loron 08-09 Novembru 2021, iha salaun konferénsia Watulete, Kota Baru, ho total partisipantes 28, feto 17 no mane 11.
Formasaun ba estudante UNDIL, hala’o iha loron 22-23 Novembru 2021, iha salaun enkontru CI, ho total partesipantes 36, feto 14 no mane 22. Unersidade da Paz hala’o iha loron 25-26 Novembru 2021, iha Salaun Multi Funsaun UNPAZ ho total partesipantes 55, feto 25 no mane 30.
Iha Institute Politecnic Betano, IPB, Same, hala’o iha loron 29-30 Novembru 2021 ho total partesipantes 54, feto 23 no mane 31. Entretantu, formasaun ba estudante East Timor Coffe Institute Ermera hala’o iha loron 09-10 Dezembru 2021 ho total partesipantes 77, feto 39 no mane 38.
Iha tempu besik, Conselho de Imprensa no Embaixada Estadus Unidos sei atribui sertifikadu ba partesipantes sira. (CI)