Díli – Conselho de Imprensa de Timor-Leste (CI) hala’o enkontru bilateral ho National Press Council of Thailand (NPCT), liuhusi Plataforma online zoom meeting.
Enkontru bilateral ne’e hala’o iha loron kinta-feira, 20 Janeiru 2022, hodi ko’alia kona-ba progresu no dezafiu sira ne’ebé órgaun reguladora entre rai rua (Timor-Leste no Thailandia) hasoru. Alein de ne’e, hala’o mós diskusaun kona-ba situasaun balun iha Myanmar ne’ebé afeta tebes ba serbisu Myanmar Press Council nian.
CI no NPCT ko’alia mós kona-ba dezenvolvimentu organizasaun Southeast Asia Press Council Network (SEAPC-Net) ne’ebé oras ne’e dadaun lidera hela husi Dewan Pers Indonesia (DPI) no sei transfere ba Myanmar Press Council (MPC). (SEAPC-Net) ofisializa ezisténsia organizasaun ne’e iha loron 4 Dezembru 2019, iha Bali, kompostu hosi organizasaun hat hanesan Conselho de Imprensa de Timor-Leste (CITL), Dewan Pers Indonesia (DPI), Myanmar Press Council (MPC) no National Press Council of Thailand.
Enkontru bilateral ne’e partisipa husi Prezidente Conselho de Imprensa, Virgílio da Silva Guterres ho membru na’in haat (4), Diretór Ezekutivu CI, Chairman of National Press Council of Thailand (NPCT), Chavarong Limpattamapanee no nia membru sira. (CI)