Dili - Conselho de Imprensa de Timor-Leste (CI) koopera ho Ministru koordenador asuntu Ekonomia (MKAE), organiza enkontru editorial ho Xefe Redasaun, Editor, no Senior Jornalista atu sensibiliza ba komunidade mídia kona-ba adezaun Timor-Leste sai nu’udar Membru Organizasaun Mundiál Komérsiu (OMK).
Editorial meeting ne’e, hala’o iha Sesta-feira, 1 Outubru 2021, iha Salaun Konferénsia Conselho de Imprensa, Quintal Boot, Díli.
Prezidente CI, Virgilio da Silva Guterres, iha loke sesaun editorial meeting ne’e hateten, “oportunidade hanesan ne’e, ema dehan oportunidade lanka, liuliu ba iha sira ne’ebé servisu hanesan jornalista, se baibain ita mak ba buka asesu atu hetan informasaun, oportunidade hanesan ne’e fontes maka lori informasaun ba ita, lori informasaun mai fó ba ita, ida ne’e mak dehan oportunidade lanka, agradese ba Sekretáriadu Tékniku mai fasilita informasaun sira ne’e, husi parte Conselho de Imprensa nian konsidera katak sensibilizasaun hanesan ne’e importante, desde inisiu kedas, ha’u pesoálmente e mós Conselho de Imprensa, halo diskusaun ho instituisaun relevante atu oinsá ita nia mídia, ita nia públiku, partisipa iha debate kona-ba prosesu polítiku hotu iha rai laran ninian e mós iha rai li’ur ninian.”
Cecar Dias Quintas, Koordenador Sekretáriadu Téknika Adesaun Timor-Leste ba Organizasaun Mundial Komérsiu, esplika oinsá Timor-Leste hahú hakat tama iha prosesu adezaun ba Organizasaun Mundial Komérsiu, “hahú kedas iha 2015, Governu Konstitusional ba dala V, hatama proposta sai membru, hahú kedas husi Sr. Antonio Conceicao, Ministru Ministériu Komérsiu Indústria nian, iha 2016 maka ita hetan status hanesan observadór no iha ne’ebá mak prosesu ne’e hahú, iha 2020 ita hahú ho negosiasaun.”
Partisipantes editoriál meeting husu kona-ba envolvimentu Governu iha rezolve disputa komérsiu sira seitór privadu rai laran no investedor sira nomós kustu ne’ebé utiliza ba adezaun ne’e e referénsia ba Produz padraun produtu komérsiu no seluk tan.
Partisipa iha enkontru editorial ne’e maka Prezidente CI, Diretór Ezekutivu CI, Koordenador Sekretáriadu Téknika Adesaun Timor-Leste ba Organizasaun Mundial Komérsiu no ekipa, Xefe Redasaun, Editor, no Senior Jornalista sira. (CI)