Dili - Conselho de Imprensa de Timor-Leste no Embaixada Estadu Unidos Amerika iha Timor-Leste asina akordu kooperasaun iha area fasilita fact-checking training ba ekipa sala redasaun kompostu husi Jornalista, Editor, Xefe Redasaun inklui Estudante nivel universitáriu, ajuda hadi’a servisu iha redasaun mídia sira hodi la publika informasaun falsu ka hoax, hadi’a kualidade produtu jornalizmu iha Timor-Leste e asegura liberdade imprensa no liberdade espresaun iha Timor-Leste.
Asina akordu kooperasaun ne’e hala’o iha, Segunda-feira, 4 Outubru 2021, iha Salaun Konferénsia Conselho de Imprensa, Quintal Boot.
Prezidente CI, Virgílio da Silva Guterres, fó hanoin katak kooperasaun ida ne’e foin formalmente halo ho Embaixada Estadu Unidos nian iha Timor iha area dezenvolvimentu mídia ninian, “hahú ho fake checking, ita hotu hatene katak informasaun falsu, desinformasaun sai ameasa ba ita nia públiku entaun Conselho de Imprensa hanoin katak estudante no foin-sa’e sira sai fatór importante Komponente atu hatene buat ne’e.”
Enkarregadór Negósiu Embaixada Estadu Unidos Amerika iha Timor-Leste, Tom Daley hateten,” Estadu Unidos honradu halo parseria ho Conselho de Imprensa no agradese ba Conselho de Imprensa nia servisu hodi hametin seitór komunikasaun sosiál iha Timor-Leste, agradese mós ba Prezidente Conselho de Imprensa ba ninia lideransa hodi dezenvolve inisiativa ida ne’e.”
“Programa ida ne’e reprezenta ita nia esforsu atu hasoru dezafiu komún ne’ebé ke ema hotu iha Estadu Unidos ho Timor-Leste hasoru loro loron, informasaun falsa ka sai husi kontestu no disinformasaun ne’ebé ema kria ho intensaun atu bosok ema seluk, sosiedade demokrátika sira loos duni, harii bazeia ba espíritu abertura liberdade espresaun maibé dala barak abertura ba liberdade ne’e ema bele esplora atu kria istória falsa, notísia falsa no rumoris, dala barak ho konsekuénsia sira ne’ebé sériu,” dehan Tom.
Partisipa iha asina akordu ne’e Enkarregadór Negósiu Embaixada Estadu Unidos Amerika iha Timor-Leste, Tom Daley ho ekipa, Prezidente Conselho de Imprensa, Virgílio da Silva Guterres ho ekipa, Universitáriu sira, Xefe Mídia sira no Jornalista sira. (CI)