Leo-Hitu – Iha loron dahuluk, Conselho de Imprensa de Timor-Leste (CI), komemora Trajédia Balibó Five ba tinan 46, iha Postu Administrativu Balibó, Munisípiu Bobonaro ho sensibiliza vasina kontra COVID - 19 no fahe mós ekipamentu prevensaun hanesan maskara, disinfectant no seluk tan no vizita rate Antigu Jornalista, Guilherme da Silva, iha Suku Leo-Hitu, Tersa-feira, 12/10/2021.
“Leo-Hitu ami mai ho intensaun ida, halo servisu hamutuk ho Ekipa Saúde Postu Balibó ho Leo-Hitu oinsá halo sensibilizasaun vasina, dala barak ita nia sosiedade balu sei ta’uk, balu ta’uk daun, balu ta’uk sona ne’e ladi’ak, tanba ne’e ami la’o atu nune’e ita nia komunidade ne’e vasina to’o hotu. Segundu atividade, ami nia Jornalista ida ho ativista, Guilherme da Silva, nia mate iha ne’e, iha Palaka no mai hakoi iha ne’e tanba nia ema Leo-Hitu oan, atu hateten Guilherme ne’e ami nia kompañeru da luta desde tempu rezisténsia ninian,” informa Diretór Ezekutivu CI, Rigoberto Monteiro.
Diretór Ezekutivu CI, Rigoberto Monteiro agradese ba kolaborasaun komunidade Suku Leo-Hitu hodi partisipa iha sensibilizasaun vasina kontra COVID – 19.
Prezidente Conselho de Imprensa husu komunidade atu enkoraja an barani ba vasina no se iha preokupasaun ruma relasiona ho vasina, husu ekipa saúde atu esplika.
Ekipa Saúde Postu Balibó no Leo-Hitu hatán preokupasaun komunidade nian hodi esplika kona-ba funsaun husi vasina, ai-moruk ne’ebé uza ba vasina, sintoma sira ne’ebé mosu hafoin vasina no seluk tan.
Partisipa iha Sensibilizasaun ne’e, autoridade no komunidade Suku Leo-Hitu ho total 109, feto 55, mane 54.