Dili - Atu sidadaun sira bele hatene ezerse sira nia direitu no deveres relasiona ho liberdade espresaun no liberdade imprensa no atu hasa’e koñesimentu autoridade lokál no lider komunitáriu sira iha munisípiu hodi bele hatene knaar CI no oinsá ezerse direitu hatán no retifikasaun ho di’ak, Conselho de Imprensa de Timor-Leste (CI) liu husi Diresaun Rejistu no Apoiu Juridiku DRAJ, sosializa knaar CI e Diretu hatán no retifikasaun ba Administradór Munisípiu Ainaro, Administradór Munisípiu Manufahi, Administradór Munisípiu Aileu nomós Komandante PNTL Munisípiu Aileu, Komandante PNTL Munisípiu Ainaro, Komandante PNTL Munisípiu Manufahi no divulga mós Sosializasaun ne’e liu husi frequensia radio komunidade Maubisse Mauloko, Radio Komunidade Tatamailau Ainaro, Radio Komunidade 1912 Manufahi, Radio Komunidade Rai Husar Aileu ho tranzmisaun radio talk ka diskusaun radio, hahu 21-25/9/2021.
Iha oportunidade hanesan, CI entrega mós Karteira Profisionál ba Jornalista ho total ema nain 24 kompostu husi Jornalista Radio Komunidade feto 9, mane 12 no Jornalista destakadu husi Jornál Diáriu Timor Post no RTTL,Ep feto 1, mane 2, iha Munisípiu Aileu, Ainaro no Manufahi inklui entrega livru Jornalizmu “Notísia Falsu & Dezinformasaun.”
Prezidente CI, Virgílio da Silva Guterres, informa katak, “objetivu husi vizita ida ne’e, Conselho de Imprensa mai munisípiu ne’e, programa ida ne’ebé loloos hola parte hanesan sensibilizasaun ba buat ida ne’ebé Conselho de Imprensa promove, direitu hatán no retifikasaun, loloos atividade ne’e la’o kleur tiha ona maibé tanba ita konfinamentu, serka sanitaria, entaun labele la’o, so agora mak la’o e ami la’o ho formatu sira hanesan ne’e, mai ko’alia ho autoridade sira, agora konsentra ba PNTL ho autoridade administrasaun, konsentra liu mak kona-ba atu fó hatene autoridade sira, utilizasaun direitu resposta e retifikasaun tanba Polísia, Komandante sira, Administradór Munisípiu sira, dala barak sai fontes ba notísia sira e dala barak mós ita nia mídia sira halo distorsaun ba sira nia deklarasaun, entaun ami atu fó hatene, ba oin, sira mós tenke hatene uza direitu ne’ebé lei fó atu bele halo korresaun nomós halo retifikasaun ba publikasaun sala kona-ba sira nia deklarasaun,”
Iha audiensia sira ne’ebé halo ho Administradór Munisípiu no Komandante PNTL Munisípiu sira, CI nota preokupasaun barak hanesan prezensa jornalista iha munisípiu, númeru jornalista sira fó kobertura ba atividade iha munisípiu no mós estratéjia komunikasaun entre jornalista ho fontes iha munisípiu.
Ho báze ba situasaun pandemia atuál no lejizlasaun sira ne’ebé regula relativa ho pandemia maka tuir planu asaun anuál Conselho nian hodi solusiona ba implementasaun atividade ida ne’e ho audiensia hodi halo diálogu ho autoridade munisipál sira kona-ba knaar Conselho de Imprensa nomós direitu resposta no retefikasaun no halo radio talk iha Radio Komunidade iha Munisípiu sira, grava no publika ka fó sai fali iha radio komunidade sira.
Tuir mai CI sei hala’o atividade hanesan iha Munisípiu Baucau no Munisípiu Viqueque.