Dili - Conselho de Imprensa de Timor-Leste (CI) no Sentru Nasionál Chega (CNC) realiza Lansamentu ba Plaka Avenida Liberdade Imprensa, iha Rotunda Francisco Xavier do Amaral, Tersa-feira, 21/9/2021.
Hafoin lansamentu, kontinua ho long mars husi Rotunda Francisco Xavier do Amaral to’o Bekora.
Atividade ne’e realiza ho objetivu atu Jornalista iha meiu komunikasaun sosiál sira iha Timor-Leste, kontribui ba prinsípiu báze liberdade ho profisaun jornalistiku iha fó informasaun ne’ebé kompletu no akuradu ba públiku. Nune’e mós atu Estudante Komunikasaun Sosiál UNTL no UNITAL no mós públiku bele hatene kontribuisaun jornalista nain 12 ne’ebé hetan oho tanba sira nia kontribuisaun ba independénsia nasaun, ne’ebé deklara ona katak estrada husi Rotunda Francisco Xavier do Amaral to’o Becora nu’udar Rua Liberdade Imprensa, informa Diretór Ezekutivu CNC, Hugo Maria Fernandes no Diretór Ezekutivu CI, Rigoberto Monteiro.
“Objetivu atividade ida ne’e atu reinstala no mos reestensaun ba Avenida Liberdade Imprensa, husi ne’e ba to’o Kamea Bekora,” dehan DE CI.
DE CI agradese ba UNESCO hanesan parseiru importante ne’ebé fó apoiu ba dezenvolvimentu mídia iha Timor-Leste no agradese mós ba CNC ba kooperasaun servisu iha tau matan ba fatin sira ne’ebé refleta jornalista sira no kampaña sira ne’ebé halo ba liberdade de imprensa nian.
Koordenadora UNESCO Office Atena-Dili, Adelina Tilman, hateten katak, “UNESCO sei nafatin apoiu esforsu hotu ne’ebé transforma mundu ba sosiedade ida ne’ebé justu no sustentável tanba ita nia futuru komún depende ba ita nia asaun sira agora”.
Prezidente CI, Virgilio da Silva Guterres ko’alia kona-ba prosesu halo plaka Avenida Liberdade Imprensa katak, “momentu ne’ebá iha 2002, AJTL mak iha inisiativa deklara Rotunda ne’e hanesan Rotunda Liberdade de Imprensa.” Prezidente CI hatutan hafoin deklara rotunda nu’udar rotunda liberdade imprensa, AJTL komunika ho produtor plaka hodi produz plaka Avenida Liberdade Imprensa.
Elliu, hanesan produtor ba plaka ne’e orgullu no hato’o razaun kontinua mantein ko kuidadu plaka maski produz no rai de’it iha fatin produz iha tempu kleur tanba hatene katak plaka ne’e importante ba refleta kontribuisaun Jornalista sira ba independénsia.
Vise Ministru Administrasaun Estatál, Lino de Jesus Torrezão, esplika kle’an kritériu tuir Lei atu define estrada ida nu’udar avenida. Nune’e mós ho Antigu Jornalista, Jose Ramos Horta, ne’ebé fahe esperiénsia pesoál nu’udar jornalista.
Partisipa iha lansamentu no long mars ne’e mak Vise Ministru Administrasaun Estatál, Lino de Jesus Torrezão, Antigu Jornalista, Jose Ramos Horta, Prezidente CI, Virgílio da Silva Guterres, Diretór Ezekutivu CNC, Hugo Maria Fernandes, Diretór Ezekutivu CI, Rigoberto Monteiro, Xefe Mídia, Jornalista, Estudante Komunikasaun Sosiál UNTL no UNITAL no Diretór Diresaun e Funsionáriu CNC no CI.