Dili – Enkontru Editoriál entre Conselho de Imprensa de Timor-Leste (CI) ho Xefe Redasaun no Editór Seniór husi mídia eletróniku, imprime no online, iha Salaun Konferénsia CI, Quintal Boot, Kinta-feira, 19/8/2021, hodi ko’alia kona-ba planu CI ba realiza komemorasaun loron mundiál liberdade imprensa, forum diálogu Dili, komemorasaun Balibo five, kooperasaun entre CI ho AJTL no TLPU nomós aprezentasaun rezultadu monitorizasaun ba publikasaun mídia durante períodu pandemia Covid-19.
Prezidente CI, Virgílio da Silva Guterres, hahú loke enkontru ne’e ho fó hanoin kona-ba inísiu pandemia covid mosu iha Timor, CI koopera ho UNDP, produz manuál kobertura pandemia Covid ba jornalista, “manuál ida ne’ebé inklui jornalista tenke proteje nia-án no na’in ba mídia sira mós tenke proteje nia jornalista sira”.
“Husu ba Xefe Redasaun Sira no Diretór Informasaun sira atu ativu halo crosscheck ho faktu, crosscheck ho fonte sira, liuliu ba jornál sira diáriu, semanáriu, Xefe Redasaun sira nia tugas utama maka halaman pertama berita pokok sira ne’e nia títulu, nia lead, Xefe Redasaun tenke halo check ho recheck ho faktu sira ne’ebé jornalista sira aprezenta, ba mídia online sira, maioria, hanesan ho mídia online iha fatin hotu, sira sai ema bolu dehan budak kecepatan, hadau malu atu uluk ne’e maka dala ruma haluha atu konfirma fonte, haluha verifika faktu, ikus mai konfuzaun ka hamosu dúvida barak,” dehan Prezidente CI.
Iha fatin hanesan Diretór Ezekutivu CI, Rigobero Monteito, informa planu CI ba reinstala plaka iha rua liberdade imprensa, informa mós komemorasaun Balibó five no kooperasaun entre CI ho AJTL no TLPU,“ halo aprosimasaun ho ministériu relevante liuliu Ministériu Estatál atu reinstala plaka.”
“Atu deside loron nasionál liberdade imprensa 16 Outubru entaun lansa kampaña ne’e iha 16 Outubru agora, partisipasaun mídia importante ba Conselho de Imprensa atu hamutuk halo advokasia ba asuntu rua ne’e,” informa DE CI.
Diretór Informasaun no Xefe Redasaun sira ne’ebé partisipa iha enkontru ne’e, sujere ba CI atu halo monitorizasaun mós ba mídia eletróniku radio, husu mós ba CI sensibiliza na’i ulun sira hodi koopera ho jornalista sira hodi asesu informasaun, kestiona formasaun ne’ebé CI fó ba estudante komunikasaun sosiál e husu foku formasaun ba jornalista no koopera ho asosiasaun jornalista hodi hametin skill jornalizmu.