Díli – Asosiasaun Hak ejiste iha iha Timor-Leste iha tempu okupasaun militar Indonézia iha loron 20 Agostu 1996 nu’udar organizasaun naun governamental ne’ebéserbisu iha área direitus umanus no justísa.
Iha loron 20 Agostu 2021, Asosiasaun Hak kompleta ona tinan 25 nia ejisténsia nu’udar organizasaun naun governamental. Hak selebra Aniversáriu iha resintu asosiasaun hak, faról, Díli, ho tema “Hakahe Kabaas Luta ba Direitu Ema Hotu”.
Iha ámbitu komemorasaun aniversáriu Asosiasaun Hak, Prezidente Conselho de Imprensa de Timor-Leste (CI), Virgílio da Silva Guterres hato’o parabens ba aniversáriu Asosiasaun Hak ba dala 25 ne’ebé monu iha loron 20 Agostu 2021.
“Lori Conselho de Imprensa nia naran, Ha’u hakarak hato’o parabens ba Hak ne’ebé kompleta ona tinan 25. Matemátikamente Hak manán ona períodu integrasaun tinan 24, Hak tinan 25 ona,” kongratula Prezidente CI, Virgílio da Silva Guterres iha nia diskursu serimónia aniversáriu Asosiasaun Hak, 20 Agostu 2021, iha faról, Díli.
Iha okaziaun, Prezidente CI Virgílio da Silva Guterres hamutuk ho bainaka sira lansa mòs Chanel Lian Direitus Umanus. Chanel ne’e sei fó oportunidade ba ema hotu atu bele ko’alia kona-ba asuntu direitus umanus nian.
Iha intervensaun, Prezidente CI kontinua kongratula Hak ne’ebé ho inisiativa estabele chanel Lian Direitus Umanus. “Lori Conselho de Imprensa nia naran, hakarak hato’o parabens ba Hak ba inagurasaun kanál ida ne’e bele kompleta marsa Hak nian ne’ebé la’o ona durante tinan 25”.
Asosiasaun Hak estabelese ho misaun no vizaun maka Primeiru, defende vítima violasaun direitus umanus, segundu, hakbi’it kapasidade komunidade liuhusi transferénsia matenek, dezenvolve povu nia kualidade moris, dezenvolve koñesimentu lokál no partisipa iha dezenvolvimentu, terseiru, kontrolu sosiál. (CI)