Dili – Asina akordu kooperasaun entre Conselho de Imprensa de Timor-Leste (CI) ho Radio Televizaun Timor-Leste Empreza Publika (RTTL, ep), iha Salaun Konferénsia CI, Quintal Boot, Kinta-feira, 19/8/2021.
Prezidente CI, Virgilio da Silva Guterres, agradese ba disponibilidade kontinua kooperasaun ne’e no agradese mós ba prezensa Prezidente Konsellu Administrasaun RTTL, ep, ba formaliza kooperasaun, “Conselho de Imprensa moris iha 2016, hahú kedas halo kontaktu ho RTTL, ep hanesan órgaun informativu estadu ninian ,oinsá koopera hodi, ida, halo kampaña edukasaun sivika iha area jornalizmu ninian ba públiku, segundu, hamutuk fó biban fasilita atu hasa’e koñesimentu ba komunidade mídia e programa Liberdade Imprensa, Ha’u Nia Liberdade la’o kleur tiha ona, agradese tanba kontinua la’o tan.”
Prezidente Konsellu Administrasaun Radio Televizaun Timor Leste Empreza Publika RTTL, ep, José Antonio Belo, agradese mós ba kooperasaun servisu ne’e,” hanesan mídia Estatál ami fó espasu ba parte hotu atu bele fó nia konteúdu ke bele ajuda públiku liuliu mós ba ita jornalista sira atu hatene ita nia misaun.”
“Iha akordu ida ohin ne’e, Liberdade Imprensa, Ha’u Nia Liberdade, ita husu katak liberdade ida responsabilidade e Conselho de Imprensa órgaun ida ne’ebé tau matan ba ami nia lala’ok, mídia ho jornalista sira nia lala’ok, ami husu ba oin koopera saida de’it mak ita-boot sira presiza,” dehan Prezidente RTTL, ep.
Prezidente RTTL, ep sujere CI fasilita pontu fokál ida entre CI ho RTTL, ep atu hare ba implementasaun akordu.