Akontesimentu demostrasaun iha loron Segunda, 21/08/2017, iha espasu entre Parlamentu Nasionál no Universidade Nasionál Timor Loro-Sa’e (UNTL), hosi Movimentu Universitáriu Timor-Leste (MUTL) ne’ebé konsege estraga virdu kareta Rádiu Televizaun Timor-Leste (RTTL.ep) nian ida no jornalísta balun kona “ gás lacromogénio (Gas Air Mata)”.
Relasiona ho akontesimentu ne’e, Conselho de Imprensa de Timor-Leste (CI) lamenta no kondena aktus ne’ebé estraga fasilidade RTTL.ep nian ne’ebé hola parte iha rekursu mídia nian hodi halo serbisu kobertura diária ba halibur informasaun.
“Conselho de Imprensa hahú ho lamentasaun nomós kondena aktus ne’ebé estraga fasilidade RTTL.ep ninian tanba fasilidade sira ne’e halo parte rekursu ne’ebé bele fasilita mídia sira atu fó kobertura ba kualker atividade inklui atividade manifestasaun ne’ebé universitáriu sira halo.”
Prezidente CI, Virgílio da Silva Guterres hato’o kestaun ne’e liuhosi konferensia Imprensa iha edifísiu CI, avenida Bispo Medeiros, Quintal Boot, Díli, Tersa-Feira (22/08/2017).
Conselho de Imprensa nu’udár órgaun ne’ebé tau matan ba serbisu komunikasaun sosiál ninian iha Timor-Leste lamenta tebtebes ba atetudi ema balun ne’ebé aproveita oportunidade hodi estraga fasilidade RTTL.ep ninian.
Tuir lei komunikasaun sosiál hatete, ekipamentu sira ne’ebé halo parte atu kompleta serbisu jornalízmu ninian labele hetan estragus no labele iha ema seluk maka hadau tanba bainhira ema ruma estraga ka hadau fasilidade orgaun komunikasaun sosiál nian konsidera hanesan krimi hasoru liberdade Imprensa Prezidente CI mós husu ba Polísia Nasionál Timor-Leste (PNTL) atu investigasaun kle’an hodi hatene loloos ema se-se maka involve iha kazu ne’e.
CI mós fó respeitu no apresia ba kualker asaun ne’ebé hola parte iha espresaun. Demostrasaun mós hola parte iha liberdade espresaun sidadaun ka grupu ninian ba ukun na’in sira. “Buat ne’ebé ita presiza konsidera maka espresaun liberdade sira ne’e labele hamate liberdade ema seluk nia,” Prezidente CI mós husu ba sidadaun hotu ne’ebé involve iha.
Prezidente CI mós husu ba sidadaun hotu ne’ebé involve iha asaun demostrasaun atu hato’o sira nia espresaun inklui mós pesoál PNTL atu nafatin respeita no fó protesaun ba jornalista sira ne’ebé halo kobertura asaun demostrasaun.
Iha biban ne’e, Prezidente CI husu ba redasaun RTTL.EP atu kumpri nafatin kode etika maske sai vítima hosi asaun demostrasaun ne’ebé organiza husi Movimentu Universitáriu Timor-Leste (MUTL), hodi kontra disizaun Parlamentu Nasional ne’ebé halo leilaun ba kareta prado.
“CI husu ba órgaun komunikasaun sosiál sira, liu-liu RTTL.ep atu kontinua fó sai informasaun ne’ebé balansu mezmu ita sai hanesan vítima ba asaun ne’ebé iha.
Enkoraja nafatin maluk sira iha RTTL.ep atu kontinua hakruk ba kódigu étika nomós kontinua imparsiál hodi hala’o profisaun,” hato’o Prezidente CI.