Polítika V no VI Governu konstitusionál fó prioridade ba área komunikasaun sosiál iha Timor-Leste, liuhosi estabelesementu Sekretáriu Estadu Komunikasaun Sosiál (SECOMS) ne’ebé lidera hosi eis jornalista, Nélio Isaac Sarmento.
Durante mandatu tinan lima (5), SECOMS konsege halo lei komunikasaun sosiál, estabelese Ajénsia nutisioza Tatoli, Estabelese Conselho de Imprensa, haforsa orgaun komunikasaun sosiál sira nomos kapasita jornalista sira liuhosi formasaun iha rai laran no rai liur.
“Lori Conselho de Imprensa nia naran hakarak kongratula Dr. Nelio Isaac ho nia funsionáriu tomak iha SECOMS,” Prezidente Conselho de Imprensa de Timor-Leste (CI), Virgílio da Silva Guterres hato’o kestaun ne’e hafoin partisipa iha serimónia agradesementu no despedida entre Sekretáriu Estadu Komunikasaun Sosiál, Nelio Isaac Sarmento, ho funsionáriu tomak SECOMS nian iha Ótel Novo Turismo, Díli, Sábadu, 19/08/2017.
Prezidente CI esplika durante mandatu SECOMS nian bele estabelese ona orgaun lubuk ne’ebé bele simbolija hanesan kro’at ida ba Timor-Leste, hodi uja nu’udar instrumentu ida ba kontribui dezenvolve rai Timor.
Lei komunikasaun importante tebes ba órgaun komunikasaun sosiál atu halo komunikasaun ho polítiku sira nune’e bele fó informasaun ida di’ak liutan ba ita nia povu.
Maske mandatu ramata, maibé tuir Prezidente CI katak ,Nélio Isaac Sarmentu, nafatin fila ba fó apoiu iha mundu jornalízmu nune’e bele dezenvolve di’ak liutan seitór komunikasaun sosiál iha Timor-Leste.
Iha biban ne’e, SECOMS, Nélio Isaac Sarmento, hatete nia mandatu besik ramata ona, serbisu balun ne’ebé lakonsege finaliza maka sei entrega ba governu foun atu kontinua polítika de implementasaun kona-ba seitór komunikasaun sosiál iha Timor-Leste “Durante tempu naruk, ha’u asumi kargu hanesan Sekretáriu Estadu, ha’u nia preokupasaun boot liu maka oinsa kria komunikasaun institusionál hodi bele alkansa tranferensia informasaun Estadu nian bainhira ita ko’ali kona-ba boa Governasaun no akuntabilidade,” Dehan Nélio Isaac.
Nélio Isaac mós agradese ba kontribuisaun hosi parte hotu órgaun komunikasaun sosiál sira iha Timor-Leste ne’ebé durante ne’e fó apoiu maka’as tebes ba nia mandatu nu’udár Sekretáriu Estadu.
Iha mandatu nia rohan, Sekretáriu Estadu lansa mós nia livru dahuluk ho tema “Pembangunan Komunikasi Kelembagaan” ne’ebé ko’alia barak liu kona-ba progresu no dezafiu sira iha área komunikasaun sosiál nian iha Timor-Leste. (CI)