Relasiona ho komemorasaun tinan ida (1) Conselho de Imprensa de Timor-Leste (CI) ejisti, Jornál Semanál Matadalan hanesan mídia ida fó kontribuisaun ba atividade CI nian liuhosi imprimi konvite dies natalis CI nian.
Manajer Negósiu Matadalan, Aureliano Ximenes hatete saída maka Jornál Matdalan fó apoiu ba CI ne’e la hare ba nia kuantidade boot ka ki’ik maibé sukat ba kbi’it Matadalan nian maka kontribui hodi imprimi konvite CI nian
“Matadalan bele apoiu buat ruma ba CI hodi produs konvite ne’ebé ho total 290, ida ne’e Matadalan la hare ba nia total, kuantidade bo’ot ou osan maibe Matadalan hare ba seriedade ka saída maka Matadalan bele halo hanesan instituisaun mídia ida atu bele apoiu ba aktividade CI nian,” Aureliano esplika ba CI.
Alein de ne’e, lori Jornál Matadalan nia naran, Aureliano louva ejistensia CI nian ne’ebé sai hanesan lutu ba mídia sira no sai mós hanesan mediadór ida ba orgaun komunikasaun sosiál sira nian.
Nia hatutan ho ejistensia tinan ida CI nia prejensa sai duni hanesan kontrolu ida di’ak ba mídia sira atu bele serbisu tuir dutriña kódigu étika jornalízmu nia hanorin nune’e mídia sira liuhosi jornalísta sira bele hato’o informasaun ho loos no faktus.
“CI mós iha lideransa sira ne’ebé iha esperiénsia lubuk ne’ebé maka lideransa CI hetan, ida ne’e sai esperensia para atu oinsá la’os regularija maibé fó hanoin ba mídia sira no jornalísta sira, ba lideransa mídia sira atu la’o no hakat tuir saída maka ita nia konstituisaun haruka, saída maka ita nia lei komunikasaun sosiál hatete.”
“ha’u hakarak lori Matadalan nia naran fó parabens ba CI ne’ebé maka foin ba tinan ida hala’o ninia aniversáriu ida ne’e, fiar katak estrutura ne’ebé maka CI iha bele mellora no hadi’a di’ak liutan, ita ninia sistema iha área komunikasaun sosiál, liuliu bele rezolve ona problema sira ne’ebé durante ne’e jornalísta sira hasoru, instituisaun mídia sira hasoru,”Aureliano esplika. (CI)