Díli – Conselho de Imprensa de Timor-Leste (CI) atribui karteira profisinál ba jornalista na’in lima (5) ne’ebé remata no pasa ona iha estájiu no ezame kompeténsia ne’ebé CI fasilita durante fulan neen.
Jornalista na’in lima hala’o estájiu karteira profisionál durante fulan neen iha instituisaun mídia ne’ebé sira hala’o kna’ar ba. Nune’e iha loron 26 Maiu 2023, iha salaun Golden Star, Audian, Dili, Conselho de Imprensa atribui kartaun karteira profisional ba jornalista na’in lima refere.
Konselleiru Francisco Belo Simões da Costa dehan karteira profísional nu’udar kompeténsia ida hodi hala’o ita nia kna’ar lorloron iha mundu jornalízmu nian.
Nia mós hato’o parabens ba entidade mídia, jornalista no asosiasaun mídia sira iha Timor-Leste tanba ho ita nia serbisu maka’as maka bele atinji índise Liberdade imprensa iha nível rejiaun sudeste aziátiku okupa primeiru lugar, no okupa pozisaun 10 husi nasan 180 iha nível mundiál.
Jornalista Aliança R. Nunes hato’o agradese wa’in ba Conselho de Imprensa tanba bele fó ona oportunidade ba sira atu hala’o estajiu to’o ejame kompeténsia, ikus liu hodi bele hetan duni karteira profisionál ne’ebé atribui husi Conselho de Imprensa.
Jornalista na’in lima ne’ebé simu karteira profisionál maka hanesan Francisco F. da C. Sony (TATOLI.IP), Osoria A. Marques (TATOLI.IP), Diana M. Soares (Rádiu Liberdade), Aliança R. Nunes (RTTL, EP), Ernestina de J. Guy (RTTL, EP).
Partisipa iha serimónia ne’e, membru Conselho de Imprensa, Diretór Ezekutivu, Prezidente Asosiasaun Jornalista Timor-Leste Press Union (TLPU), Prezidente Uniaun Profisionál Jornalista Timor Leste (UPJTL), Diretór Ezekutivu Radiu Liberdade, jornalista sira no funsionáriu Conselho de Imprensa.
Bele sai jornalista maka sidadaun hirak ho otas boot ne’ebé goza direitu sivil sira no iha abilitasaun, pelumenus ensinu sekundáriu. Kondisaun atu hala’o profisaun jornalista nian mak abilitasaun ho ninia títulu rasik, hanaran karteira profisionál, ne’ebé Conselho de Imprensa mak fó no renova. (CI)