Díli – Conselho de Imprensa de Timor-Leste realiza atividade sosializasaun lei komunikasaun sosiál ba estudante Universidade Nasional Timor Lorosa’e (UNTL), Departamentu Komunikasaun sosiál.
Atividade ne’e hala’o iha loron 04 maiu 2023, iha Fakuldade Siénsias Sosiais, Caicoli, Dili. Atividade ne’e hodi sosializa lei komunikasaun sosiál, kona-ba kompeténsia sira Conselho de Imprensa nian, inklui mós direitu resposta no retifikasaun.
Partisipa iha atividade sosializasaun ne’e, estudante departamentu Komunikasaun Sosiál, semester 3 no 5, hamutuk na’in 100 ne’ebé foti hela matéria Lei dos Media. Aliende ne’e, partisipa mós husi dosente sira iha departamentu komunikasaun sosiál.
Vise Diretór Departamentu Komunikasaun Sosiál, Roberto da Costa Pacheco hato’o agradese wa’in ba Conselho de Imprensa tanba bele partilla hamutuk ho estudante sira kona-ba lei mídia nian.
Nia hatutan oportunidade ne’e importante tebes ba estudante sira, nune’e Roberto Pacheco husu estudante sira atu aproveita ho másimu. Sosializasaun ida ne’e bele loke estudante sira nia pensamentu kona-ba lei mídia nian ne’ebé vigora iha país ida.
Iha abertura, prezidente Interinu Conselho de Imprensa, Amito Araujo hato’o mós agradese wa’in ba estrutura UNTL liu-liu departamentu Komunikasaun Sosiál hodi fó oportunidade ba Conselho de Imprensa hodi sosializa lei komunikasaun sosiál ba estudante komunikasaun social.
Nia dehan lei komunikasaun sosiál importante tebes ba estudante departamentu komunikasaun sosiál sira atu hatene kona-ba lala’o implementasaun lei ne’e rasik tanba estudante komunikasaun sosiál sira maka estuda kona-ba jornalízmu nian.
Sosializasaun lei Komunikasaun Sosiál ne’e nu’udar kompeténsia Conselho de Imprensa nian hodi bele konsensializa públiku kona-ba importánsia serbisu órgaun no meiu komunikasaun sosiál sira nomós jornalista sira nia kna’ar hodi bele promove di’ak liutan Liberdade imprensa no Liberdade espresaun iha Timor-Leste.
Aliende ne’e, iha lei komunikasaun sosiál mós ko’alia kona-ba kompeténsia sira Conselho de Imprensa nian nu’uda entidade administrativa independente hodi tau matan ba lala’ok serbisu órgaun no meiu komunikasaun sosiál sira nian.
Kompeténsia Conselho de Imprensa haktuir iha lei Komunikasaun sosiál artigu 44 alinea a hatete Promove liberdade espresaun no imprensa nian no independénsia meiu komunikasaun sosiál nian sira husi influénsia ema se de’it, grupu ka interese polítiku no ekonómiku. (CI)