Díli – Conselho de Imprensa de Timor-Leste (CI), Ajénsia Programa Nasoens Unidas ba Dezenvolvimentu (PNUD/UNDP) hamutuk ho Embaixada Japaun iha Timor-Leste, lansa Matadalan Reportájen Eleitorál ba Jornalista no Meiu Komunikasaun Sosiál sira.
Projetu Dezenvolve Matadalan Reportájen Eleitorál ne’e mai husi serbisu hamutuk entre Conselho de Imprensa no Ajénsia Programa Nasoens Unidas ba dezenvolvimentu no hetan apoiu husi Governu Japaun.
Prezidente Interinu Conselho de Imprensa, Expedito Loro Dias Ximenes hatete Matadalan Reportájen Eleitorál nu’udar guia ida ba jarnalista sira hodi halo kobertura no hakerek notisia sira kona-ba eleisaun prezidensial no parlamentar ninian.
“Matadalan ida ne’e hanesan guiaun ida ne’ebé jornalista bele kaer iha prosesu leitorál prezidensiál no parlamentár,” Esplika Konselleiru Expedito, atividade lansamentu Matadalan Reportajen Eleitorál ne’ebé hala’o iha salaun enkontru Conselho de Imprensa, iha loron segunda-feira, 14/03/2022
Konselleiru Expedito hato’o agradese wa’in ba UNDP no Governu Japaun tanba durante ne’e kontinua fó apoiu ba Conselho de Imprensa hahú husi nia mandatu to’o ohin loron hodi dezenvolve seitór komunikasaun sosiál sosiál iha Timor-Leste.
Vise Embaixadora Japaun ba Timor-Leste, Kazumi Yamada hatete, depois de fulan tolu bainhira PNUD ho Conselho de Imprensa asina nota entendimentu, konsege produs ona Matadalan Reportájen Eleitorál ida.
“Guia ida ne’e kobre regras bájikas ne’ebé jornalista sira presiza observa enkuantu asegura mós direitus bájikas jornalista sira nu’udar votantes ka eleitores,” dehan Vise Embaixadora Japaun ba Timor-Leste, Kazumi Yamada.
Reprezentante Rezidensia UNDP ba Timor-Leste, Munkhtuya Altangerel hatete PNUD no CI serbisu hamutuk liuhusi projetu eleisaun rejilénte ba Covid ne’ebé maka finansia husi Governu Japaun.
“PNUD sente onradu tebes atu kongratula Conselho de Imprensa ba dezenvolvimentu matadalan reportájen ba eleisaun,” hatete Reprezentante Rezidensia UNDP ba Timor-Leste, Munkhtuya Altangerel.
Partisipa iha atividade lansamentu Matadalan Reportájen Eleitorál maka hanesan Prezidente Interinu Conselho de Imprensa, Expedito Loro Dias Ximenes, Vise Embaixadora Japaun, Kazumi Yamada, Reprezentante Rezidensia UNDP ba Timor-Leste, Munkhtuya Altangerel, Diretór Ezekutivu Conselho de Imprensa, Rigoberto Monteiro, Project Manager Core TL, UNDP, Tito Filipe no jornalista sira. (CI)