Díli – Prezidente Conselho de Imprensa de Timor-Leste (CI), Virgílio da Silva Guterres, kuarta-feira ne'e, 15/12/2021, iha Sentru Audio Vizual Max Stahl, Simu Saudozu Max Stahl nia Urna ho lian dadolin poezia “Um Minuto de Silencio” ne’ebé hakerek husi Saudozu Francisco Borja da Costa.
Tuir mai, lia simu no poezia ne’ebé Prezidente Conselho de Imprensa hato’o;
Max, Benvindu mai fali O nia uma atu hela hamutuk ho povu ne’ebé O hadomi.
O fila mai iha ahi kedesan, ahi kedesan ne’ebé sei nakfilak ba anin, anin ne’ebé sei haforsa ami hotu nia iis, Anin korajen ninian, ahi kedesan ne’ebé sei haktuir órden anin ninian hanesan jornalista ne’ebé haktuir órden públiku ninian, órden ema injustisadu ninian, ema mukit ninian.
Ami jornalista Timor-Leste laiha buat murak ruma atu haktuir ba O, iha de’it maka korajen ne’ebé O husik hela iha rate Santa Cruz atu defende povu Timor ninia interese. Ida ne’e maka ami promote atu haktuir atu nune’e kontinua lori nafatin iha ami nia memoria nomós iha ami nia espíritu, espíritu aten brani ninian, aten brani atu hasoru dezafiu saída de’it bainhira ami hala’o ami nia serbisu.
Hanesan liafuan murak, Ha’u konvida ita hotu, atu hamutuk ho ha’u resita jornalista ida seluk ninia poezia, Borja da Costa ne’ebé nia diriji atu fó ónra ba nia eroi sira hotu no Max, O eroi boot povu Timor ninian, O merese hetan respeitu ida ne’e. tanba ne’e, mai ita hotu hamutuk halo Um Minuto de Silencio.
Calai
Montes Vales e Fontes
Regatos e Ribeiros
Pedras dos Caminhos
e Ervas do Chão,
Calai,
Calai Passaros do Ár
e Ondas do Mar,
Ventos que Sopram
Nas Praias Que Sobram
de Terras de Ninguem.
Calai,
Calai Canas e Bambos
Árvores e Ai-Rus
Palmeiras e Capim
Na Verdura Sem Fim
Do Pequeno de Timor.
Calai
Calai-vos e Calemo-nos
Por um Minuto
É tempu de Silencio
No Silencio de tempo
Au Tempo de Vida
Dos que Perderam a Vida
Pela Patria
Pela Nação
Pelo Povo
Pela Nossa Libertação
Calai, Um Minuto de Silencio.
Bem Vindo mai O Uman, Max. Obrigado