Maubara – Conselho de Imprensa de Timor-Leste (CI), realiza workshop ida durante loron 5 (13-17/12), iha Casa Retiro Maubara, Postu Administrativu Maubara, Munisípiu Likisa, hodi trasa Planu Estratéjiku ba tinan lima períodu 2022-2026.
Iha diskursu abertura, Prezidente Conselho de Imprensa, Virgílio da Silva Guterres hatete, hare ba referénsia sira pasu, liuliu planu estratéjiku tinan lima ba kotuk, maka liuhusi workshop ida ne’e, bele hamosu diskusaun ida nakloke ba partisipantes hotu hodi hato’o sujestaun sira nune’e bele rezulta planu estratéjiku ida di’ak hodi implement aba tinan lima tuir mai.
“Ita sempre hare ba kotuk, saída makai ta halo ona, liuliu referénsia ba planu estratéjiku ne’ebé ita halo ona iha tinan haat ka lima ba kotuk. Hein katak diskusaun sei nakloke bai ta hotu atu hato’o saída makai ta hakarak atu propoin hodi hadi’a di’ak liutan Conselho de Imprensa. Planu Estratéjiku tuir mai, ita buka atu mantein saída maka lei haruka hanesan organizasaun atu halo,” esplika Prezidente CI, Virgílio Guterres
Prezidente Conselho de Imprensa mós hato’o agradese wa’in ba prezensa Sekretáriu Estadu Komunikasaun Sosiál nomós parseiru sira nia disponibilidade hodi marka prezensa no partilla hamutuk hanoin ruma ba dezenvolvimentu planu estratéjiku Conselho de Imprensa nian.
Iha biban ne’e, Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, husu atu Conselho de Imprensa tau mós prioridade ba asuntu rekursu umanu.
Alein de rekursu umanu, SEKOMS husu atu Conselho de Imprensa hahú tau atensaun mós ba área infraestrutura liuhusi ekipamentus sira ne’ebé adekuadu nune’e bele servi públiku ho di’ak liutan.
SEKOMS mós fó hanoin ba Conselho de Imprensa atu nafatin hare Lei rádiu difuzaun ne’ebé oras ne’e dadaun iha ona Ministériu Asuntu Parlamentares no Komunikasaun Sosiál nia liman.
Iha fatin hanesan, Diretór Ezekutivu Rigoberto Monteiro hatete, liuhusi workshop ida ne’e bele identifika bele identifika vizaun, misaun, objetivu jeral sira nune’e bele utilija iha tinan lima oin mai liuhusi Planu Asaun Anuál sira.
“Ita hahú atu identifika ita nia Vizaun no Misaun, objetivu jerál estratéjiku sira, atu nune’e tinan lima ba oin ita bele uza hodi guia ita nia planu no programa asaun anuál sira,” esplika Diretór Ezekutivu Conselho de Imprensa.
Atividade workshop ne’e realiza durante loron 5, hahú husi 13 to’o 17 Dezembru 2021, iha Casa Retiro Maubara, Postu Administrativu Maubara, Munisípiu Likisa. Partisipa iha atividade refere, Sekretáriu Estadu Komunikasaun Sosiál, Prezidente Conselho de Imprensa no membru na’in haat, Fiskál Úniku CI, Diretór Ezekutivu Conselho de Imprensa ho nia estrutura tomak, parseiru dezenvolvimentu sira hanesan Asosiasaun Jornalista Timor Lorosa’e (AJTL), Timor-Leste Press Union (TLPU), Mídia Na’in, nomós funsionáriu tomak Conselho de Imprensa. (CI)