Díli - Conselho de Imprensa de Timor-Leste (CI), Autoridade Nasionál Komunikasaun (ANC) no Ministériu Asuntu Parlamentares no Komunikasaun Sosiál (MAPKOMS), realiza enkontru tékniku jurídiku entre instituisaun tolu.
Enkontru refere realiza iha salaun enkontru ANC, Caicoli, Dili, iha ne’ebé patisipa husi Prezidente Autoridade Nasional Komunikasaun, João Oliveira Freitas no ekipa jurídiku ANC, Xefe Gabinete MAPKOMS, Felismina Joaquina Belo no ekipa Jurídiku MAPKOMS, Diretór Rejistu Apoiu Jurídiku CI, Zenilton Zeneves no Diretór Komunikasaun Sosiál, Relasaun Institusional no Kooperasaun CI, Altino da Cruz Freitas.
Iha enkontru ne’e, parte tolu ko’alia liu konaba oinsa maka CI, ANC no MAPKOMS bele serbisu hamutuk hodi bele kria kondisaun legais ida ne’ebé akumula interese serbisu CI, ANC no MAPKOMS nian ba órgaun no meiu komunikasaun sosiál sira molok hetan lisensa frejistu frekuénsia transmisaun husi ANC.
Prezidente ANC mós komprometidu atu halo revizaun ba rekezitus legais sira ba rejistu frekuénsia transmisaun nian hodi bele enkaixa mós pedidu sira husi CI no MAPKOMS nian nune’e bele asegura di’ak liutan kompetensia sira iha instituisaun tolu refere.
Tuir lei komunikasaun artigu 28 haktuir Órgaun no meiu komunikasaun sosiál sira tenke halo rejistu ida ba-iha Konsellu Imprensa.
Iha artigu 16, lei Komunikasaun sosiál kona-ba lisensiamentu ba frekuénsia haktuir Meiu komunikasaun sosiál radiofóniku no televizivu nian sira bele funsiona bainhira iha lisensa frekuénsia nian ne’ebé Autoridade Nasionál Komunikasaun nian maka sei fó, atu asegura jestaun loloos espetru radioelétriku nian.
Relasiona ho lisensa ba orgaun komunikasaun sosiál estranjeiru nian tuir alinea 1 hosi artigu 25 hateten, Órgaun komunikasaun sosiál estranjeiru nian ne’ebé maka hakarak atu halo distribuisaun ka tau korrespondente ida iha Timor-Leste tenke presiza halo rejistu órgaun no akreditasaun jornalista nian hosi Konsellu Imprensa. (CI)