Dili - Prezidente Conselho de Imprensa de Timor-Leste (CI), Virgílio da Silva Guterres, ofisialmente loke Treinamentu Jornalizmu Ambientál, iha Sentru Formasaun João Paulo II, Komoro, 16/6/2021, ne’ebé organiza husi Asosiasaun Jornalista Timor-Lorosa’e (AJTL) ho apoiu husi UNDP/PNUD Timor-Leste.
Prezidente Asosiasaun Jornalista Timor-Lorosa’e, Zevonia Vieira, informa katak treinamentu jornalizmu ambientál realiza ho objetivu jornalista iha hanoin krítiku ba asuntu ambientál, mudansa klimátika no polítika sira ne’ebé iha ligasaun ho ambiente no hametin profisionálizmu jornalista iha fó informasaun ne’ebé kredivel no balansu.
Prezidente AJTL agradese ho kooperasaun servisu ne’ebé di’ak entre AJTL ho UNDP.
Deputy Resident Representative UNDP / PNUD Timor-Leste, Lazima Onta Bhatta, hateten “mídia nia papél importante tebes iha asuntu ida ne’e, bele eduka ita nia an, bele eduka komunidade e mós bele sama atensaun ba polítiku nain sira kona-ba asu ida ne’e.”
Prezidente Conselho de Imprensa de Timor-Leste (CI), Virgílio da Silva Guterres, kongratula AJTL no kongratula mós UNDP ba inisiativa di’ak halo kooperasaun hodi realiza treinamentu, nune’e bele esplora koñesimentu jornalista sira nian ba meiu ambiente. “Meiu ambiente sai prespektivu importante e nesesáriu iha area jornalizmu nian hanesan mós ho prespektivu sira seluk hanesan jéneru no legal tanba ne’e mak Conselho de Imprensa apresia inisiativa ida ne’e”, hatete Prezidente CI.
Treinamentu Jornalizmu Ambiental sei realiza iha loron 3 nia laran, hahú 16 – 18, Juñu 2021. Partisipa iha treinamentu ne’e maka Jornalista ho total 12 ne’ebé mai husi Radio, Televizaun, Jornál no Online. (CI)