Viqueque – Conselho de Imprensa de Timor-Leste (CI) hala’o sosializasaun kona-ba Lei Komunikasaun Sosiál (KomSos) no Regulamentu sira CI nian iha salaun Administrasaun Munisípiu Viqueque, Tersa-Feira, 12/09.
Iha abertura, Reprezentante Administradór Munisípiu Viqueque, Paulino Pinto hatete sosializsaun ne’e importante tebes atu públiku presiza komprende no hatene lala’ok lei KomSos no regulamentu sira CI nian.
“Sosializasaun ida ne’e importante tanba povu presiza hatene dezenvolvimentu dadauk la’o ona to’o iha ne’ebé, ohin oportunidade di’ak atu komprende di’ak regulamentu sira ne’ebé regulariza sistema komunikasaun, atu ita bele koopera no husu ba komunidade hotu atu bele servisu hamutuk ho mídia sira ne’ebé eziste iha munisípiu Viqueque,” Paulino esplika.
Reprezentante Administradór, Atuál Diretór Aprovizionamentu Munisípiu Viqueque ne’e dehan iha prosesu deskonsentrasaun, ema hotu presiza nakloke hodi fahe imformasaun ba mídia nune’e públiku bele hatene prosesu dezenvolvimentu.
Nia hatutan órgaun no meius komunikasaun sosiál sira presiza duni regulamentu ida hodi regulariza, tanba bainhira notísia la tuir regras bele afeta moris populasaun no nasaun nian. Nune’e, Paulino, énfaze katak presiza duni CI atu kontrollu no regulariza jornalísta sira.
Iha biban ne’e, Diretora Ezekutiva CI, Ana Teresa Sequeira, introdus estatutu no funsionamentu CI nian ne’ebé atu asegura no promove Liberdade Imprensa no Liberdade Espresaun iha Timor-Leste.
“Lori regulamentu atu mai introdús kona-ba saída maka Jornalista halo no labele halo no saída maka públiku presiza halo no labele halo, introdús regulamentu kona ba servisu Jornalista nian,” Diretora Ezekutiva (DE), esplika perante partisipantes.
Hafoin Diretór Diresaun Apoiu Jurídiku no Liberdade Imprensa (DAJLI), Olderiku da Kosta no Ofisiál DAJLI, Antonito dos Reis ramata aprezentasaun kona-ba lei KomSos no regulamentu sira CI nian. Iha sesaun diskusaun mosu lamentasaun balun katak mídia ohin loron kobre de’it iha kapitál Díli no la halo kobertura to’o ba munisípiu, postu administrativu, suku no aldeia sira.
Iha biban refere, partisipantes sira husu mós ba órgaun no meius komunikasaun sosiál sira atu bele públika mós progresu no dezafiu sira ne’ebé povu Viqueque hasoru dadaun nune’e ema hotu bele hatene.
Partisipa iha Sosializasaun ne’e, Administradór Postu Administrativu sira, Komandante Polísia Eskuadra Watukarbau, xefe suku sira, Jornalista husi Rádiu Komunidade no Jornalista korrespondente sira no autoridade kompetente sira Munisípiu Viqueque nian hamutuk ema na’in 38, kompostu hosi feto 8 no mane 30.