Dili, Iha loron Kinta, 30/4/2020, Conselho de Imprensa de Timor-Leste (CI) simu dadus husi Timor-Leste Press Union (TLPU), relasiona ho mosu dezentendementu envolve Jornalista RTTL,EP no Estudante Feto nain rua iha Fronteira Mota-Ain.
Prezidente TLPU, Manuel Pinto, iha sorumutu ho Prezidente no Membru CI, iha salaun Plenaria CI, Quintal-Boot, informa katak, “kazu ne’ebé maka foin lailais, 23/4, akontese iha fronteira ne’ebá, kuandu Indonesia deporta sidadaun nain 6 husi Indonesia mai Timor, iha ne’ebá mosu dezentendementu entre sidadaun sira ne’e ho Jornalista RTTL,EP ne’ebé oras ne’e dadauk nia ativu hanesan membru TLPU.”
“TLPU foti inisiativa hodi akumula dadus husi akontesimentu ne’e hanesan referénsia ba halo papél TLPU nian iha fó advokasia ba Jornalista sira. Conselho de Imprensa iha papél atu halo mediasaun tanba ne’e mak TLPU foti mós inisiativa hodi entrega dadus ba Conselho de Imprensa, esplika Prezidente TLPU.
“Dokumentus ne’ebé fó mai sei sai hanesan referénsia ba Conselho de Imprensa iha hala’o ninian knar,” dehan Prezidente CI, Virgílio da Silva Guterees, wainhira simu dadus ne’ebé entrega husi TLPU.