Previous Next

Conselho de Imprensa Atribui Karteira Profesionál 15

Díli – Conselho de Imprensa de Timor-Leste (CI) atribui ona karteira professional ba Jornalista na’in 11 no estudante estajiáriu na’in haat (4), ho totál hamutuk na’in 15, iha sesta-feira (20/12/2019), iha salaun Delta Nova.  

Prezidente CI, Virgílio da Silva Guterres husu ba benefisiáriu karteira professional sira atu kontinua estuda, labele para atu apriénde tanba profisaun jornalízmu nu’udar mundu aprendizajen ne’ebé laiha rohan.

“Atribuisaun Karteira Profesionál, la’ós tanba professional ona, para estuda atu estuda, para atu apriende, tanba jornlizmu ne’e hanesan mundu aprendizajen ida ne’ebé nia rohan laiha, so mate mak foin para. Hein katak maluk sira ne’ebé simu tiha ona, kontinua apriende atu hasa’e tan kapasidade ida seluk ne’ebé dalaruma ita seidauk hetan,” dehan Prezidente CI, Virgílio da Silva Guterres.

Benefisiáriu karteira profesionál, Jornalista Ajénsia Nutisioja, Tatoli.IP, Rita Almeida hatete karteira profesionál vale liu kuandu ita nia produtu jornalístiku muda ema nia pensamentu no polítiku nia desizaun ba interese ema barak nian. 

“Karteira Profesionál ne’ebé ita simu, hanesan karta kondusaun, ho nia sentidu ita aprovadu hosi ejame sira kona-ba regra hotu hosi sinais trájitu,” Rita Almeida dehan, liga ba atividade jornalítika nian, ita tenke hatene didi’ak saída maka lei sira vigor iha repíblika ida ne’e, hatene didi’ak saída maka kódigu konduta no regra sira seluk entidade públiku no privadu sira estabelese exeptu ba interese públiku. 

Antigu jornalista ne’e sujere ba Conselho de Imprensa katak atu haforsa Karteira Profesionál iha sentidu hodi hametin profesionalízmu jornalista la’ós ho surat tahan ne’e de’it maibé oinsá hamosu ezijénsia ida dignifika atu profisaun ne’e bele iha kredibilidade hodi kontribui informasaun ne’ebé kualidade públiku. 

“husu ba públiku no Conselho de Imprensa atu kontinua akompaña lala’ok sira ne’ebé simu ona karteira professional atu la’o nafatin tuir regra sira nomós tempu atu fó atensaun ba jornalista sira ne’ebé ho intensaun hodi viola kódigu konduta ba interese grupu ka partidária,” sujere Rita Almeida. (CI)


Imprimir   Email