Previous Next

CI Realiza Semináriu KIS hodi Avalia Serbisu iha Mandatu Dahuluk

Railaco – Conselho de Imprensa de Timor-Leste (CI), realiza semináriu ho tema “Komunikasaun, Integrasaun no Sinkronizasaun – KIS,” durante loron tolu (3), hahú hosi loron 16-19 Dezembru 2019, iha Railaco. Semináriu ne’e ho objetivu atu halo avaliasaun ba serbisu Conselho de Imprensa nian durante mandatu tinan tolu resin, hodi bele mellora di’ak liutan serbisu CI nian iha futuru.

Iha abertura, Diretora Ezekutiva, Ana Teresa Sequeira hatete semináriu refere bele sai hanesan reflesaun ida ba Conselho de Imprensa iha futuru bele hadi’a liutan serbisu CI nian iha área tolu importante hanesan komunikasaun, integrasaun no komunikasaun. “Sesaun ne’e anuál iha tinan ikus fó oportunidade mai ita atu bele ko’alia no espresa maibé ita bele ko’alia idakidak nian, depois moderadór mak sei modera.

Hein katak ita nia sesaun sira bele hadi’a ita nia komunikasaun, integrasaun no sinkronizasaun iha ita nia serbisu,” esplika Diretora Ezekutiva, Ana Teresa Sequeira, iha nia intervensaun bainhira halo abertura ba semináriu KIS, iha Railaco, segunda-feira, 16/12/2019.

iha semináriu KIS, diskuti kona-ba avaliasaun ne’ebe fahe parte rua hanesan avaliasaun interna no externa. Iha avaliasaun interna, modera hosi Sr. Jose Luis de Oliveira no avaliasaun externa aprezenta hosi peskizadór Tomas Freitas ne’ebé Conselho de Imprensa kontrata hodi halo peskiza ida ba munisípiu hotu inklui RAEOA hodi hatene kona-ba ejisténsia no serbisu CI nian durante nia mandatu besik tinan haat.

Semináriu KIS hetan partisipasaun hosi estrutura tomak Conselho de Imprensa nian, durante loron tolu, iha munisípiu Ermera, postu administrative Railaco. Conselho de Imprensa hari bazeia lei komunikasaun sosiál, iha loron 10 Maiu 2016 hanesan loron ne’ebé membru sira simu pose hosi Parlamentu Nasionál hodi promove liberdade imprensa no liberdade espresaun iha Timor-Leste. (CI)


Imprimir   Email