Previous Next

Conselho de Imprensa Realiza Ezame Karteira Profisionál ba Dahuluk

Dili, Ezame ba jornalista estajiáriu nain haat(4) iha forma rua, eskrita no oral, realiza iha salaun plenaria Conselho de Imprensa de Timor-Leste (CI), Kuarta-feira, 27/11/2019, hodi hatene jornalista estajiáriu sira nia abilidade no koñesimentu iha area jornalizmu nian molok sira hetan karteira profisionál.

Lia hirak ne’e hato’o hosi Membru Conselho de Imprensa de Timor-Leste (CI), Konselleiru, Francisco Belo S. Da Costa, iha edifísiu CI, Matadouru. “Ita iha ezame iha versaun rua, ida ezame oral, ida ezame eskrita, hosi ezame ne’e mak ita foin hatene hirak ne’ebé mak iha Kompeténsia duni atu bele hetan karteira profisionál.”

Estájiu nu’udar parte ida husi prosesu edukasaun no iha kontestu jornalizmu nian, ida-ne’e foka-liu ba prátika jornalizmu nian oinsá kandidatu jornalista profisionál sira hanaran “Jornalista Estajiáriu” sira direitamente tau iha prátika teoria ka matéria ne’ebé sira aprende ona iha sentru formasaun jornalista nian no universidade sira. 

“Halo aplikasaun mai Conselho de Imprensa hodi hetan karteira profisionál, ida ne’e ba dahuluk ne’ebé Conselho de Imprensa halo, ezame karteira profisionál ba sira estajiariu nain haat(4), ne’ebé kompleta fulan neen ona estájiu iha órgaun no meiu komunikasaun sosiál sira ne’ebé eziste iha Dili, hodi aplika ba iha karteira profisionál,” esplika Konselleiru, Francisco Belo.

Iha biban hanesan Konselleiru Belo mós informa katak CI sei entrega karteira profisionál iha fulan Dezembru 2019 nia laran la’ós de’it ba estajiáriu sira ne’ebé partisipa iha ezame maibé sira ne’ebé aplika tuir Lei hatete katak hala’o  ona knar jornalizmu iha tinan lima.

“Tuir oráriu, sei entrega karteira profisionál ba sira iha Dezembru, la’ós sira hirak ne’e de’it maibé sira ne’ebé halo aplikasaun ona, tuir Lei hatete katak fó injesaun ba sira ne’ebé tinan lima atu hetan karteira profisionál,” dehan Konselleiru, Francisco Belo.

Tuir Lei Nú 5/2015, Lei Komunikasaun sosiál, Conselho de Imprensa (CI) mak iha komptensia atu fornese atividade estájiu ba jornalista sira ne’ebé atu hetan títulu profisionál. Tuir Lei Komunikasaun Sosiál, Artigu, 14: Asesu ba profisaun jornalista nian hahú hosi estájiu obrigatóriu ida, no remata ho aproveitamentu, ho durasaun fulan sanulu resin ualu, fulan sanulu resin rua no fulan neen, ba ema ne’ebé iha ensinu sekundáriu, iha lisensiatura iha área ne’ebé de’it no iha lisensiatura iha área komunikasaun sosiál nian.


Imprimir   Email