Previous Next

CI Sensibiliza Lei KomSos no Regulamentu CI ba Editor no Diretór Mídia

Dili, Conselho de Imprensa de Timor-Leste (CI), realiza sensibilizasaun Lei Komunikasaun Sosiál no Regulamentu CI ba Mídia Nain no Jornalista Sira iha salaun konferénsia Garden Beach, Pantai Kelapa, Sesta-feira, 22/11/2019.

Iha introdusaun, Diretora Ezekutiva CI, Ana Teresa Sequeira, esplika kona-ba sensibilizasaun Lei Komunikasaun Sosiál no Regulamentu CI nian ne’ebé hala’o tiha ona hanesan hala’o sensibilizasaun ba Autoridade Lokál nomós Autoridade Defeza no Seguransa. “Conselho de Imprensa halo ona desde Conselho de Imprensa estabelese iha 2016. Entaun mai iha 2017, 2018, 2019, ami kontinua nafatin halo sensibilizasaun Lei Komunikasaun Sosiál ba kolega jornalista sira nomós ba autoridade lokál sira iha munisípiu, iha territóriu tomak.”

Diretora Ezekutiva CI, Ana Teresa Sequeira, hatutan katak, “Conselho de Imprensa la’o ona volta munisípiu tomak atu mós hasa’e autoridade lokál sira nia koñesimentu, ezemplu, Administradór Munisípiu, Administradór du Postu, Xefe Suku, inklui mós PNTL, ami kobre hotu ona hosi introdús Lei Komunikasaun Sosiál, tanba dala ruma jornalista sira tun ba terenu sempre hasoru autoridade sira ne’ebé maka bele mosu dezentendimentu entre rua ne’e, iha terenu, entaun ho Sosializasaun ita hein katak sira mós bele komprende, koñese di’ak liután profisaun jornalista nian tanba ne’e mak tinan ida ne’e ami halo tan focus sensibilizasaun ne’e ba polísia sira, entaun  halo tiha iha ona iha munisípiu Viqueque, Bobonaro no ikus liu iha Oecussi.”

DE CI ne’e esklarese katak, “agora iha ikus tinan ida ne’e, ami hakarak halo sensibilizasaun ba autoridade sira ne’ebé tuur iha mídia, sira ne’ebé halo desizaun, tanba ne’e maka sensibilizasaun ba ohin loron nian, ami nia alvu ba liu editor sira ho Diretór Mídia sira tanba sira maka halo desizaun iha instituisaun mídia, dala barak notísia atu tun sira mak deside, atu ba halo kobertura sira mak deside, entaun se wainhira kapasita ka fó informasaun sufisiente ba sira, sira bele ajuda jornalista sira para atu bele la’o tuir korredór étika ninian.

Partisipa iha enkontru ne’e mak Diretor Midia, Xefe Redasaun no Jornalista sira ho total partisipantes 37.


Imprimir   Email