Balibó, Conselho de Imprensa de Timor-Leste (CI), hala’o serimónia komemorasaun akontesimentu Balibó ne’ebé jornalista estranjeiru nain lima mate wainhira hala’o kobertura kona-ba infiltrasaun militár Indonézia iha postu Administrativu Balibó, Munisípiu Bobonaru, iha loron 16 fulan Outubru tinan 1975.
Iha sesaun introdusaun selebrasaun ne’e, iha loron 15/10/2019, Diretora Ezekutiva CI, Ana Teresa Sequeira, agradese tanba Conselho Imprensa organiza eventu ida hodi hanoin hikas trajédia Balibó ne’ebé akontese iha tinan 44 liu ba.
“Trajédia Balibó ne’ebé ikus mai koñesidu ho naran Balibó Five ne’e, marka ho Jornalista nain lima hosi Australia no Nova Zelandia ninia mate, bainhira hala’o hela knar iha Balibó,” esplika Diretora Ezekutiva CI.
Diretora Ezekutiva CI ne’e hatutan, “servisu jornalizmu hatudu funsaun ne’ebé importante, kontribuisaun ne’ebé ba hametin ema nia direitu nu’udar ema.”
“Atu valoriza servisu jornalizmu ne’e, hahú tinan ida ne’e Conselho Imprensa hamosu ona prémiu ida ho naran Prémiu Greg Shackleton, ne’ebé fó ba reportajen jornaliztiku ba Interese umanu, di’ak liu, ba kategoria mídia eletróniku, radio no televizaun,” dehan DE CI ne’e.
Diretora Ezekutiva subliña kona ba tanba saida hanaran prémiu Greg Shackleton katak, “atu fó rekoñesimentu ba ninia kobertura hosi Balibó, Bobonaro, ne’ebé fó influensia ba libertasaun nasionál, hosi ninia reportajen dada atensaun ba Timor oan sira nia luta, no hasa’e presaun mundu ba hapara violasaun direitu umanu ne’ebé akontese .”
Atividade iha komemorasaun ne’e mak hanesan kalan reflesaun, exposizaun fotografia, loke reportajen dokumentáriu televizivu no semináriu iha Postu Administrativu Balibó, Munisípiu Bobonaro, hahú iha loron 15 - 17 fulan Outubru tinan 2019.
Programa ne’e, organiza hamutuk ho Asosiasaun Jornalista Timor – Leste, Timor-Leste Press Union (TLPU) inklui ho autoridade lokál Munisípiu Bobonaro ne’ebé sei partisipa hosi jornalista sira, responsavel órgaun no meius komunikasaun sosiál, asosiasaun jornalista, Sekretária Estadu Komunikasaun Sosiál, Autoridade Munisípiu Bobonaro no Postu Administrativu Balibó inklui konvidadu sira seluk.