Atividade

Reuni Alumni TJK, Fahe Esperiénsia no Haluan Konetividade iha Mundu Jornalizmu

Dili, 02/07/2019 – Conselho de Imprensa de Timor-Leste (CI) hamutuk ho ajénsia internasionál Programa Nasoens Unidas ba Dezenvolvimentu (PNUD/UNDP), realiza sorumutu (reuni) alumni Treinamentu Joranlizmu Kompriénsivu (TJK).

Objetivu hosi reuni alumni TJK maka haluan konetividade no fahe esperiénsia ba malu, define estratéjia karreira profisionál, oinsá bele dezenvolve dadu no arkiva dokumentu nomós oinsá bele familiariza sosiál media guide line.

Reuni alumni TJK ne’e ho tema “Hasa’e Jornalista nia Kompeténsia, Hametin Profisionalizmu iha Futuru”, hodi halibur hikas estudantes sira ne’ebé frekuenta ona formasaun jornalízmu ne’ebé fasilita hosi CI no UNDP.

Partisipantes iha reuni ne’e hamutuk na’in 75, mai hosi estudante Treinamentu Jornalízmu Kompriénsivu faze primeiru, segundu no terseira, ne’ebé realiza iha loron 27 Juñu 2019, iha Ótel Ramelau.  

“Imi hanesan fini di’ak ida ne’ebé Conselho de Imprensa no UNDP LEARN Project Produz ona. Ami konsidera imi hanesan fini di’ak iha períodu sira tuir mai,” dehan Diretora Ezekutiva, Ana Teresa Sequeira, ba partisipantes reuni alumni TJK. 

Diretora espera katak iha tinan tolu ka haat oin mai, partisipantes Treinamentu Jornalízmu Kompriénsivu bele sai jornalista profisionál tuir saida maka Conselho de Imprensa hakarak.

Tanba liuhosi formasaun ne’ebé Conselho de Imprensa no UNDP fasilita ona ba estudante TJK sira bele sai hanesan fini ka bukae ida atu bele aprofunda estudante sira ida-idak nia koñesimentu.

Iha biban hanesan, Manager LEARN Project-UNDP, Tito Filipe, hatete formasaun ne’ebé partisipantes TJK sira hetan ne’e hanesan eransa ida ba serbisu sira ne’ebé maka CI no UNDP hala’o ona.

“Ha’u fó obrigadu barak ba foin-sa’e sira ne’ebé maka mai partisipa iha formasaun ida ne’e hosi faze primeiru to’o terseiru,” esplika Tito Filipe.

Tito filipe rekoñese duni partisipantes TJK faze primeiru to’o terseiru, ne’ebé iha tebes abilidade ba hakerek, halo reportajen no filmajen.

Durante loron ida tomak, reuni alumni TJK, diskute hamutuk asuntu sira hanesan hala’o manajementu ba dadus no arkivu, koñesimentu kona-ba matadalan mídia sosiál no dezenvolvimentu karreira profisionál. (CI)